ХӀукуматли жагьилтала культура ахъбуцес ва, ­литератураличила, тарихличила имцӀали багьахъес ­багьандан, ­сагаси проект ­гьалабихьили саби. Ил проектлис «Пушкинна ­карта» бикIар.

Сегъуна хӀянчи бирули илини?
Сентябрьла 1-личибад бехӀбихьили, 14-личибад 22-личи ­бикайчити дусмала адамтани илгъуна карта абхьес бирар. Ил ­баркьудилизиб кумекли бетарар пачалихъла гIяхIдешунала сайт, «Госуслуги. Культура» бикӀуси программа телефоннизи ­кабатурли. Приложение абхьибхӀели, хасси карталичир (Пушкинна карта или сунес бикIуси) 3000 къуруш дирар. Илди арц культуралашалти далдуцуначи укьесцун пайдаладарес вирар.
Илкьяйдали жагьилтас имканбикIур дигуси спектакльличи, ­театрлизи яра культурала цархӀил балбуцличи букьес, илхIелира карталичирти сурсатуни пайдаладарили, чула арц харжхӀедарили.
ХӀукуматла пикрумазиб леб гьар дус илди картабачи 5 азир къуруш кадирхьес. Амма, иш дус ахирличи биркни багьандан, 3 азир къурушцун сари картабачи дархьибти.
Буралли, дила пикрили, дебали гӀяхӀси ва пайдаласи ­балбуц саби. Студентуни гьалакли бирар хъули яра ­библиотекабази, чула дурсрачи хӀядурбиэс. Илдала мурталра-декIар ­дахъал арц хIедирар. Амма бахъла театрлизи букьес иштяхӀ алкIан. ­Гьайгьайра, филологияла ва культурала факультетунала ­студентунас театртази башес имцIали дигахъу. Ил ­багьанданра, сагаси проектли илдигъунти имканти гьаргдирули сари. ­Дебали гӀяхӀси саби, нушала хӀукуматли илдигъунти жагьилтала иштяхIуни-хьуланачи пикри бяхIчиаъни.