1961 ибил дуслизиб Ере­ван­­на художественно-теат­раль­­ный институт­ли­­зиб Дар­­­­гала пачалихъла музыкала-драмала театр абхьиб­сири. ИлхIейчибадал бехI­­би­хьи­­­ли, Даргала театрли ГI.Ба­ти­райла у би­ху­си саби.
Театрли сценаличир бегI гьалар тIаш­датурти пьесаби сарри М.Лермонтовла «Бэ­ла», А.Кьурбановла «Къайтмасла мекъ», Ж.-Б.Мольерла «Скапенна макру».

Даргала театрла сценаличиб чебаахъибси «Мерс» бикIуси пьеса РСФСР-ла культурала Министерствола кIиибил даражала дипломличил шабагъатлабарибсири, «ГIялибек Багъатиров» бикIуси пьеса биалли, ХI.ЦIадасала у бихуси республикала премияличи лайикьбикибсири.
60 дусла духIнар театрла сценаличир че­даахъили сари 140-йчир имцIали дурала улк­нала классикала, советская ва Дагъис­танна драматургияла произведениеби хIясибли тIашдатурти пьесаби. Театрли чула спектакльти чедиахъули сари Дагъистанна шими-шагьуртазир ва цархIилти мераначир.
1959 ибил дуслизиб Ереванна теат­ральный институтлизибад бакIибси, профессор В.Т.Вартанянни бекIдеш дируси, комиссияли МяхIячкъалализиб 15 студент-дарган чула институтлизи бучIахъес буцибтири. Илди студентуни сабри Даргала театрла бегI гьалабси хьулчи. ГIергъити дусмазиб театрла бекIлибиубси хьулчи саби ишди удиб гьанбушибти гIяртистуни: Россияла халкьла гIяртист Наби Ибрагьимов, РФ-ла искусствобала урибси хIяракатчи, театрла художественный руководитель Мустапа Ибрагьимов, Дагъистанна халкьла гIяртистуни Нариман ГIялиев, СягIид ГIялибеков, Муслимбек КемцIуров ва ХIясбулла ГIисаев, Дагъистанна бурибти гIяртистуни Марзият Шапиева ва Юсуп Мустапаев, ДР-ла рурибси гIяртистка Сапият ГIябдулмуслимова, республикала премияла лауреат ва ДР-ла халкьла гIяртист Рупат Чараков, гIяртистуни М.-Р.МяхIяммадрасулов, М.НухIов, М.Аскандарова, С.Шагьман­даро­ва, Р.ИсмягIилова, А.Ша­пие­ва, А.Риз­ванов, Г.Рабаданов ва цар­хIил­ти.
1961 ибил дуслизиб ГI.Батирайла у бихуси Даргала музыкала-драмала театр акIахъубти дусмазив ну 14 дус виубли леври. ИлхIели ну Сергокъалала педучилищелизив учIу­сири.
Дусмала бухъяндешли (итхIейчирад 60 дус дикили сари) ну хатIавиркули виэсра асубирар, амма, ишбархIи чебаибсиван билзули саби наб ца секIал. Белики, Даргала театрли ил Сергокъалализиб чебаа­хъибси бурги, наб ил спектакль ну акIубси шила биштIаси клуб­лизиб чебаэс бикибу яра наб МяхIячкъалализиб им­кан­бакIибу ил спектакль чебаэс, хIебалас…
Ну М.Лермантовла «Бэла» бикIуси повесть хIясибли тIаш­батурси пьесаличила сайра гъай­икIуси. Ишав, цугли 40 дус урга даражала школализир урусла литературала дурсри кадирхьули калунси, ну хатIаикес хIейрус. Ил спектакльлизиб Максим Максимычла роль бузахъуси гIяртист дила шан ва гIур дила юлдаш ХIябиб Наврузов сайри. Тяп Лермонтовла повестьлизирван, спектакльлизивси Максим Максимычли чедаахъибтири дубурлан рурси Бэлачи (Издаг МяхIяммадова) дихьибти дигай. Дебали уркIецIидухъири ясир рурсиличи дахъал дусми Кавказлизив ургъуси урусла штабс-капитанна. Тамашавиэслири, гьалар сунени хIералуси рурсиличи илала хIеруди чебиухIели.
ГIур, дусми ардякьунхIели, нуни багьурра ил спектакльлизир Казбичла роль бузахъуси Ш.Валиджановли, Аза­матла роль Н.ГIялиевли ва М.ГIябдуллаевли, Печо­рин­на роль бузахъуси Н.Иб­ра­гьимовли биъни. Багьурси­ри 1959 ибил дуслизиб Ереваннизиб ва 1961 ибил дуслизиб Дагъистанна филармонияла заллизиб театр ибхьнила хIул­букI­риличибра «Бэла» чебаахъибси биъниличилара. Ит заманала театрла гIяртистуни лебилра ХIябиб Наврузовличил барх Ереванна художественно-театральный институтлизиб бу­­чIули калунти сабри. Жагьил замана ну ХIябиб Наврузовли­чил цацахIели къаршииркули ви­раси, ил багьандан театр­личил дилара камси бархбас лебсири. Наб гьанбиркур театрла сценаличиб «Отелло» спектакль кабихьибти гIер­гъити бурхIназир «Колхозла байрахъ» газетализир (гIя­чихъли бурес хIейрусра) дакIудухъунтири ишди назмула тугъи:
«Дурарухъен гьаргала,
Дездемона даргала,
Чераэс дигулрину,
Дила хIулбала шала.»
Тугъи тяп ихди сари ви­кIес­ра хIейрус (кIел гIергъити тугъ нуни пикридарибти диэс­ра асубирар). Ам­ма гIячихъли бу­рес вирус: Даргала театр­ли «Отел­ло» бегI гьалаб че­ба­а­хъиб­хIе­ли, Дез­демонала роль Издаг Мя­хIям­ма­довани бузахъуси биъ­ни.
ГIур ил пьеса театрли дар­­гала шимазиб чебиахъес бехI­бихьиб. Нушала шилизиб бухъна хьунри бархли, «вал­лагь, Наврузла ХIябиб чеваэс» би­кIули, колхозла клуб­ли­зи дуцI­бикIутири. Мурт театр ба­кIаллира, клуб адам­тани бир­цIу­сири, «нушала ХIя­биб лев ши­лизи вакIили» бикIули, ила ба­шутири. Нушала ХIябибли наз­мурти ва хабурти лукIи. Чумал жузра дураибтири.
Амма ХIябиб театрлизив вахъхIи-декIар кахIелун: ну гIяр­миялизивад чарухъунти дус­мазив ил МяхIячкъалализив цархIил хIянчиличив узулри. Ил тяхIярли, камсилра чIу­ма­диэс далкьхIеурли, пашдехъуб театрличилти дила юлдашдеш.
БусягIят нуни театрла коллективлизив валуси чIянкIли театрла художественный руководитель Мустапа Ибрагьи­мов­цун сай: нуша иличил ца-кIел дус гьалар ЦIурхачир бай­рамличир МяхIяммадрасул Са­лихIовла хъулир тянишдиубтири. Баласра: илини Дарга­ла театрла коллектив, гIурра, ар­дякьунти 60 дус тяхIярли, бархьси гьунчибад башахъес кьас­биру. Юбилейличил бархбасахъи, лебилра театр­ла коллективлис дулгулра арадеш ва гIуррара сархибдешуни!
Даргантала иштяхI­ду­хъес­ли спектакльти гьаладирхьули, адамтала уркIби разидирес им­канбакIаб хIушаб, ахIерти гьалмагъуни!