Ленинград азадбатахъуртачила баянти дурчнила шайчибси «Медаль моей памяти» бикIуси балбуц гьанна бетурхули саби. Ил бехIбихьибсири 2021 ибил дусла январьла 27-личибад. Ил бархIи сабигу Ленинград душмантазибад азадбатахъурсира.

 Балбуцлис бекIдеш дирутили бетаур бархбасунала ва багьахънибала комитет ва Санкт-Петербургла Архивла комитет. Гьанна балбуц сентябрьла 19-личи бикайчи бухъянбитIахъи саби.

Балбуц дурабуркIуси бекIлибиубсигъуна майданни бетаур интернет-портал «Медаль «За оборону Ленинграда» (https://medal.spbarchives.ru/), сунезирра Ленинград азадбатахъурти игитуначила баянти гьаладирхьуси. Ила кадерхахъурли сари: бутIакьянчибала сияхI, саби-бегIти карточкаби, илдас дедибти шабагъатуначила белкIани.

  Архивла документуни дебали мягIничертили детарар шагьар батахъуртала тухумтас. Илдачила чеимцIати баянти дагьахъес дебали багаладирар илди. Балбуцла бекIлибиубсигъуна мурадли бетарули саби, Ленинградлизибти адамтала асилти баркьудлуми муртлисалра тарихлизир калахъни.

  Балбуцла кIиэсил бутIали бетарули саби «ВКонтакт»-лизибси(https://vk.com/mymemory_medal) сайт. БусягIятла манзил илар игитуначила 200-личирра имцIали белкI лер гьаладихьили.

  Иличи че, Ленинград азадбатахъурти адамтала гIямруличила, ЧебяхIси ВатIа дергъла манзилтас ва  Ленинград азадбалтахънилис хасдарибти видео-материалтира дархли гьаладихьили сари.

  Балбуцла баянти хIясибли, лерилра дучибти материалти Санкт-Петербургла пачалихъла бекIлибиубсигъуна архивлизи ва Ленинград азадбатахънила пачалихъла музейлизи дедлугути сари. Илкьяйда лерилра дучибти материалти кадерхахъурли электронный сборникра бируси саби.

  Балбуцла сиптакартани хIуша-ургав Ленинград азадбатахъес ургъули калунси левли виалли, иличила баянти дархьахъес тиладибирули саби. ХIушала хабар чедир гьандушибти сайтаначи бархьес дирудая.

   ЧебяхIси ВатIа дергъла бутIакьянчибачила баянти дучес   лебтанилра кумекбарес хIяжатси  саби, сенахIенну ил чедибдешличила тарих калахъес лебилра РФ-ла адамтала чебла саби.