Улкализиб адамтази прививка барахънила хIяракат ­д­аим­ба­рили саби. Бахъалгъунти ташмишдешлизиб лебал, ­прививка барили, гIяхIлил, яра – хIебаралли.

ХIера, се пикрибарилил «Концерн «Покровский» ГК-ли, хIян­чи­зартази коронавирусла чейхъуси изайчи къаршиси ­вакцина ­барахъес ва чула арадеш мяхIкамбарахъес багьандан. ­Июльла 23-личиб Каневский бикIуси шилизиб ил компанияли ­сунела хIянчизарти-ургаб ПокровскийСтопКовид бикIуси балбуц дура­беркIиб. Илизир бутIакьяндеш дарес вири вакцина барибси ­гьарил хIянчизарли. Чедибдеш сархибси «Агрокомплекс ­«Ейский» ОА-ла («Концерн «Покровский» ГК-лизи кабурхуси) механизатор ­Вячеслав Осначлис бекIлибиубси савгъат – автомашина Лада Гранта — бикиб.
ЦахIнабли балбуцлизир 900-цад адамли бутIакьяндеш дариб. Илдазивад гьариллисра диштIати савгъатуни гиб.
ГьанбуршехIе, вакцина барибти адамтала лугIи хIясибли, ­Краснодарский край цаибил мерличи дурабухъи саби.
Вице-премьер Т.Голиковани Президентла бутIакьяндешли­чилси совещаниеличиб багьахъни хIясибли, жамигIятлизи прививка барахънила хIяракат ­гьалакбарахъес ибси масъала лерилра регионтала гьала тIашбатурси саби. ЦахIнабси иммунитет акIахъес багьандан, ноябрьла 1-личи ­бикайчи ­улкала жамигIятла 80 процент прививка барибтили биахъес гIягIнибиркур.