«Кайтаги» бикIуси этноцентрлизиб ПатIимат Мирзаева Кавказла пи­сательтала кьукьялизи карер­хахъ­ни­личил бархбасахъи, илала твор­чест­волис хасбарибси литературала вечер ду­ра­беркIиб.

Балбуц дураберкIибсири, «Хайдакьла урунжуни» бикIуси литературала цахI­на­бикла дазурбазиб, «Кайтаги» этноцентрла ва социальный бяхIчибизлашал районна адамтас кумек гIеббиахъуси Центрла сип­та хIясибли. Илар бутIакьян­деш дариб: дар­­ган мезла дурсрала мугIял­лим­та­ни, куль­­турала Центрла гIяр­тис­ту­нани, П.Мир­зае­­вала гъамтани, гьалмагъунани ва цар­хIил­­танира…
ГIяхIли кьабулбируси хъулиб ПатIимат Мирзаевала произведениебала выставка гьа­лабихьилри. Лерри илар поэтла хъали-цIа­ла бекIахъудила лишантира: суратуни, илини хайдакьла някьишли делкIунти чIян­кIи…
Балбуц бехIбирхьули, «Хайдакьла урунжуни» бикIуси литературала цахIнабикла руководитель ва «Кайтаги» этноцентрла директор Зубайдат ХIясановани къантIли П.Мирзаевала биографияличила баянти дуриб. Илала творчестволи ва Хайдакьла някьиш сагадирнилизир дарибти хIянчили, районна культурала бекIахъудила гIям­рулизи халаси ва мягIничебси пай кабирхьниличила гьанбушиб.
«ГIямрула жура-журала манзилтазир делкIунти, пикрумани дицIибти, разидеш ва пашмандеш духIнадуцибти илала назмуртани нушала уркIи кIантIибикIахъули саби. ПатIимат Мирзаева пагьмучерси поэтцун ахIенну, нушала лерилра далдуцунала бутIакьянчи, сунела ВатIан дигахъуси, чеалкIуси наслулис бяркъ бедес къайгъичерси адам сари. УркIи-уркIиларад мубаракрирулри, ПатIимат, Кавказла писательтала кьукьялизи карерхниличил. ГIурра назмуртани лукIахъес чIумаси арадеш булгулра хIед», — рикIи З.ХIясанова.
Мубаракла ва баркаллала дугьбачил балбуцла цархIилти бутIакьянчибира гъайбухъун.
Илкьяйдали гъайрухъун ПатIимат Мирзаевара. Илини сунела творчествола гьуниличила буриб ва ВатIайс хасдарибти, сагати 2-3 назму делчIун.
«Кавказла писательтала кьукьялизи карерхахъниличи ва чеалкIуси наслулис набчила гьанбиркахъес се-биалра гIелаб батес рирниличи ну дебали разилира. Баркалла лебтасалра ну гIерруцнилис»,—рикIи ил.
Балбуцла ахирличир культурала Центр­­ла гIяртистунани П.Мирзаевала гъай хIя­сиб­ли далуйти делчIун.