Июньна 28-личиб ца бархIи-дугила ургаб коронавирусла чейхъуси изайзи бикибтала лугIи 128-личи абаили саби. Амма дагъистанланти хъярхъли прививка барахъес букьес гIягIнили биъниличила васвасбикIули лебал.

Республикализирти аги-кьяйда (COVID-19 изайс къаршидеш дирахъуси вакцина бирахънила шайчирти) баяндарахъес ва сай-вегIси пикри бурахъес или, нуша Хайдакьла районна администрацияла бекI ГIялим МяхIяммадович Темирбулатовличи дугьадизурра.
«Нуни балутани ва гъамтани (хIейгеси биалра, илдазибад цацабехIти изай гIямрулизибад арбухиб) коронавирусла чейхъуси изала сецад декIли чекасибал чебаили гIергъи, сегъуналра ташмишдеш агарли, ну прививкаличи вякьунра.
Вакцинала кIиибил бутIа наб апрельла 9-личиб бариб. Цаибил уколлис гIергъи кьаркьайзиб циила зягIипдеш акIуб, гIергъила бархIи халаси ахIенси температурара дакIубиуб. ЦахIнабли касалли, вакцина гьамадли чекасира.
Нуша бекIла дармай арадешлис лерхути заралтачи бекIлил хIердикIули ахIенра, сунечил барх кабихьибси кагъарлизи илдачила гIячихъли белкIи биалра. Вакцинала зараллизирад биалли дебали урухкIулра.
Дила пикри хIясибли, нушала ва гъамтала арадешлис, гIямрулис урехиличила гъайдикIухIели, хьулчи агарти къунбачи лехIяхъили, вакцина заралла саби или кадирес асухIебирар. СенкIун, шалгIеббухъунси дуслизиб дагъистанлантани чебаиливан, коронавирусла чейхъуси изай алкIахъуси зарал гьатIира халаси саби», — баянбариб ГIялим МяхIяммадовичли.