ДР-ла БекIла къуллукъуни заманалис дузахъуси Сер­гей Меликовли рес­пуб­­лика бахъал туристуни башниличи хIя­дур­ли хIебиъниличила багьахъур. Май­ла 25-личиб илини туризма гьалабяхI ба­шахъ­­нила масъултас хасбарибси сове­ща­ние дураберкIиб.

«Республикализи бахъал туристуни башнили нушала гьала мурад тIашбатур: илгъуна кьадарличи нуша сецадла хIя­дур­ли­ра? Цалра бетуцлизир нуша илди аги-кьяйдаличи хIядурли хIедиъни якьинбиуб», — викIи ил.
С.Меликовла гъай хIясибли, масъулти гьунчидикахъес ва бузери лайикьси тяхIярли тIашбатес чебиркур.
«Майла байрумтачиб гIяхIцад турис­ту­ни бакIиб. Нушани илдала кьадар кам­хIе­бир­нилизи халбирулра», — багьахъур илини.
ДР-ла туризмала министрла къул­лукъуни заманалис дузахъуси Эмин Мер­дановла гъай хIясибли, республикала турис­тический рынокличиб регионна 11 туроператор, 53 турагент бузули са­би. «ДяхIцIилиуб» кавлули, туризмала шай­­чирти къуллукъуни гIердиахъутачила гъай­­икIалли, илдала лугIи 200-личи абиркули саби. Министрли буриливан, законагар шайчиб бузери дурабуркIути предпринимательти ахтардибирнила черкад ведомствобала ихтиюрти агара.
Э.Мердановли багьахъурливан, Дагъис­таннизирти туризмала объектуни, гIяхI­цад анцIбукьуназир, урехи хIеби­рахъ­нила тIалабуначи далдикили ахIен, ил лугIилизир – Сулахъла къярд, Гамсутль, СалтIа ва цархIилти. Дахъалгъунти, адамти башути майдунти хIяжатти гIягIниахълумачил гIердуцес чебиркур или чеимцIабариб министрли.