ШалгIеббухъунси дус­ла ахирличир ДР-ла ара­деш мяхIкамбирнила шай­чиб­си Минис­терстволи районтала боль­ни­цабас 11 компьютерла томографуни асиб­­тири. Гьанна районтазир илди ваяхI кадирхьути ва дузахъути хъул­ри дал­кьарахънила шайчирти хIян­чи та­мандирули сари. Лавашала район­ни­зир илди хIянчи бегI гьалар та­ман­дариб.

«86 азир адам хIербируси районнис, сунезирадра республикала 16 шилизи гьундури аркьуси, арадеш ахтардибирнила шайчирти ваяхI кадихьни дебали разиси анцIбукь саби. Ил анцIбукь ваяхI асили кадихьниличибцун таманхIебарили, «Земский доктор» программа хIясибли районнизи багьудичевси рентгенологра вархьили сай. Или ибси биалли, зягIипти ишаб бусягIятал ахтардибирес бирни ибси саби», — рикIи арадеш мяхIкамбирнила шайчирси министр Татьяна Беляева.
КТ-ла кабинет ибхьнилис хасбарибси балбуцлизир бутIакьяндеш дариб Лавашала районна бекI Шамил Дабишевли, районна депутатунала Собраниела председатель Юсуп ГIялибековли, арадеш мяхIкамбирнила шайчирти организациябала руководительтани ва республикала депутатунала корпусла вакилтани.
Сагати ваяхIли къалабали ва бархьли изала кабилзахъес имкан луга. Илгъуна къалабадеш хаслира чараагартили дирар, бехIемцIлизи бикибти адамтас къалабаси кумек гIеббаахъес гIягIнихIели, ва декIли зягIипти адамти республикала больницабази бурхьес бетхIерухIели, яра инсульт кабизахъес.
КТ кабирхьуси юрт сагабарес харждарибти сурсатуни ДР-ла арадеш мяхIкамбирнила шайчибси Министерстволи декIардарибтири. Илкьяйда халаси кумек гIеббаахъиб «Денеб» ОАО-ла, «Левашинское ДЭП» ОАО-ла ва къаркъубала мягIдунтала бургани. Камси заманала бухIнаб гьарзаси кIидерхIла юрт тIашбатурсири: цаибил дерхIлизи КТ-ла аппарат кабихьили саби, кIиибиллизиб – конференц-зал бирар.
Министрли больницала отделениеби дармунти ва арадеш мяхIкамбарес пайдаладирути ваяхI лерал, агарал ахтардидариб, зягIиптас хIеруди бирнила даражаличи хIеръиб ва зягIиптачил гьунираиб. Гинекологияла ва дурхIни биркьуси отделениеби сагадарес гIягIнили биъни аргъахъиб, ва ил баркьудилис гIягIнити документуни далкьаахъес хъарбариб, жявси заманализир ремонтдирути больницабала сияхIлизи белкIахъун. Илкьяйда больницала бекI тухтурла чус хIедиути кIел гьатIи ваяхI асахъес ибси пикрира гIеббуциб.
Районна больницализиб дураберкIибси хIянчилис ва коронавирусла чейхъуси изала тIинтIбикIуси манзил барибси хIянчилисра министрли ахъси кьимат кабатур.
Гьанна коронавирусла чей­хъуси изайзи бикибти чейхъути излумала отделениелизибцун агара. Ил изайзибад мяхIкамбиэс багьандан, лавашакунтли прививка бирахъули саби.