ХIяйдар шила медпунктла заведующийли гIяхI­цад дусмазив узулри. Сунела чебяхIси даражала багьуди лебли хIебиалра, илини тухтурла гIердирулри. ХIяйдарли райбольницала бекI тухтурлис мурталра дерубти ва зярхIти диъби, мирхъила варъа, цIедешла гавлагуни, гIярбукIла мургьи-арцла устнани дарибти жагати ваяхI ва цархIилти секIли дихутири ва сунес диганта виркьес имканти алкIахъутири. Сунела ва хьуна гъамтас хIянчурби дикахъиб, хIукуматла машина сунес дигусиван пайдалабири, рушбатуни сайсули адамти хIянчиличи кабалти… камси багьана баргили, цацабехIти тIутIубири ва сагадан лявбикIахъули ва арц сайсули, чарбири.

КIинайс илала даража илцадра ахъбиублири, хIятта районна гIяхIцад шимала адамтас пенсияби кадирхьулра или шикьсайуб. Илкьяйдали илала хъули, бикIуливан, арцла хIеркI кабухъун. Пенсия кабирхьуси комиссияла члентира багьла-багьлали илини сунес дигнабяхI бирхъескайиб. Ил пача сайхIеливан хIяйтлизиври, сегъуналра хIянчи хIебири ва санаторийтазира курортуначира мурталра бамсриахъес ваши. КъантIли буралли, илис лявбикIутира бахъбикIулри, сайра бархIиличи-бархIи хамирулри.
БегIлара тамашала, зягIипти дебали инжитбирахъулри пенсия кабирхьухIели, аратас ил галгаличибадли гIинц кабердесцадалра къиян чехIебаили, биркулри. Иличи мешубикес къайгъилизибтира айхъулри, амма илди гьатIира «хъярхътили» уббулхъулри. ХIяйдарлис арцла имцIасигъуна бутIара бикахъили, илдани пенсияби кадихьиб чумал адамлис. ГIур 10-15 адамлизирадли ХIяйдарли сайсутачир цакьадар камдарили, арцра сасили чинарил арбякьи, беткахъиб. Ил секIай ХIяйдарла «хIурмат» гьатIира ахъбиахъуб. Илини уктемдешличил багьахъур:
— Чебиулраяв, сегъунти адамти лебли буилил? Нуниван хIушаб гIяхIдешуни хIедиру кьалли чилилра.
Амма дусмадли дуги-хIери хIеили бузули, цаладяхъибти арц сунени инсапагарли сайсес илис цIахбилзули ахIенри. Илала дурабадлира, илала хъулир, хъучир, дурхъир ва бузерила мерличир хIянчи дарахъес удиркахъули ахIенри илала къаравашунани. Илра сунела хIурматлизи халбирулри ил баркьагарли. Шилизир хIябал кIялгIнигъунти юрт тIашдатур, шелра дурхIялис дурхъати машинаби асиб, Дербентлизирра МяхIячкъалализирра гьарил дурхIялис ца-ца квартира дикахъиб, сай мицIирли левай диганта виркьесцад напакьа кабихьиб.
Бухънакабаили, верхIелра шайчи булкIуси хIяв­бецIличи мешувикахъиб ил ахирра дусмани. Амма сунела «хIурматла» мер бацIли кахIелахъун. ВахъхIи ил «тах» бикахъес хьуликIуси ва дудешла къелкад чевхIелкIи вашес хIядурси ХIяса ахирра уркIила мурад баиб.
ВехIихьиб ХIясан дудешла «дурсри» сагадешунани чедирцIахъес. Бархьаначи буралли, илала киса гьатIира бягIусили уббухъун.
Гумайлизи кайили шилизивра урибси масхарачини чучивяхI гъамируси ХIясан чеили писбатур:
— Наб гьанбиркусири хIукуматли адамтас пенсияби кадирхьути дургар или, хIукумат ХIяйдархъала ихтиярлизиб биъниличи гьанна сайра шакикибси.
— Илдигъунти гъайли хIу пенсия агарли кавлахъури, — викIулри илала унра.
— Пенсияличи ваэс гьанналис 10 дус кали сари, ил манзилла бухIнаб, белики, хIукумат барсбиэс.
— Гьанна дудешличирадли дурхIначи дашули сари хIякимдеш. ХIу биалли пенсияличи хьулмайкIуд…
— Низличибадли – низ, ваваличибадли вава башниличила хъумартурра, чердерхирая…