ГIергъити бурхIназиб нушани гьаман иргъулра ­адамли ­биш­тIатачи гуж бирули саби или. Илкьяйдали дахъал сари, ­дурхI­ни са­би-ургаб бирхIули, биштIати хIебалтниличила ­хабуртира. ­Кас­пийск­ла, Къизларла, Буйнакъскла школабазир ­илдигъунти ­анцI­бу­кьуни кадикиб.

Хабуртани халкь-ургар дахъал гъузгъалдидешра акIахъуб. Гьанна нушала гIямру дебали дархдаси сари ­Интернетличил. Ил багьандан селра дигIянбарес вирули ахIен. Баянти дигIяндирниличила гъай нуни хIязлис ахIен ахъдуцибти. ­Нушала республикализиб хIербирути адамтала хIял-тIабигIят ­дебали декIардулхъути сари. Нушала халкьли кабикибси ­кахси яра вайси анцIбукь чизилра хIебагьахъурли, чула ургаб бекIбарес къайгъи дакIубиру. Ил багьандан илдигъунти ­журала ­такьсиртачила ­нушани гьалаб камли иргъусири. Гьалар илди анцIбукьуни ­агартири бикIутачи ну вирххIерус. Амма ­камли-биалра диэс ­асубири. СенкIун Советский Союзлизиб чеалкIуси ­наслу ­пачалихъла ­политикала хIерудила дайлаб сабри, бучIантас ­лайикьси бяркъ бедес гьуцIлизибри. Ил улка тIутIубарили гIергъи, ­лерилра секIал усалдикиб. ДурхIначила биалли, пачалихъла хужаимтани бекIлил хъумкартур. БегIлара хIейгеси— чула дурхIначила ­хъумкартур бегIтанира. СенкIун яшавбарес хIяжатлири. ­Экономика бархIиличи-бархIи усалбиркухIели, ишбархIи ­барибси ­къурушлис жагIялла бархIи секIал асес хIебирули кавлулри. ­Илкьяйдали алапа бекIлил хIелугути дусмира дири. Ил ­багьандан ахIенара ­нушала агира сагадан усалбиркес, багьуди агарти ­специалистуни имцIабикIес бехIбихьибси? Чисалра дигIяндеш ахIен секьяйда кайсусирил 90-ибти дусмазиб багьуди.
Илди адамтала дурхIни ишбархIи бяркъ агартили ­халабиули саби. ХIуша набчил кьабулхIедикесра асубирар. ХIебиалли ­бурая набзи: секьяйда хIердикIулрал хIушала дурхIначи. Лебилра бегIти илдигъунти саби викIес хIейрус. Амма бахъли виштIасила ­някъбази телефон яра цархIил гаджет бедлугули саби. Илди ­халабиули саби телефонтачи мусаллатчебтили.
Гьалабван, ну ютублизивад журналист ГIямар МяхIяммадовла передачаличи хIеризурра. Илар гъай хьунул адамтачи, дурхIначи гуж бирниличила сарри. Илини илкьяйдали ­сунени ­кумекбируси Марьям бикIуси хьунул адамличилара бурулри. Илала ­баркьудлуми цархIилтас гIяхIдилзули ахIенри. ­Чедибра ­буриливан, бахълис илдигъунти анцIбукьуначила багьахъес ­дигули ахIен. Амма, секIал дигIянбирули, масъала арзес хIейрар. Илала черкад хIянчи дирес чебиркур. ГIяхIсири ­илдигъунти анцIбукьуни бекIлил кахIедикахъес ил шайчир ­иргъахънила ­далдуцуни дурадуркIалри. Динна Идаралис, ­пачалихъла ­организациябас, школабас ва жамигIятла организациябас ил масъалала чебкад пикрибухъес чебиркур.
Буралли, ишбархIи дурхIнани летчикуначибад, ­косманавтуначибад, морякуначибад, гIялимтачибад ахIен гIибрат касес дигуси. Ил багьандан илди вайнукьабала ­дякькад архIебукьяхъес къайгъибарес, сахъдеш дакIубирес нушаб ­чебиркур. Сеналра хъумартес асухIебирар дурхIни нушала ­челябкьла биъниличила. Илдас лайикьси багьуди ва бяркъ дедес чебиркур.