Гьалабван, нушала улкала бахъал адамти бачабархахъибтири Интернетлизибад чебаахъибси кахси анцIбукьли.

БусягIятал чебиахъуси, Twitch бикIуси видеохостинглизибад блогер Стас Решетниковли дурабуркIуси эфирла замана Валентина Григорьева гIямрулизирад шалгIеррухъунсири. Ил бяргIибси балконничи дурарушили калунсири, ва илар алхунсири. Адамтани чебиули, Стасли ил хъули аррухибсири ва сунела гIяйибличирли ребкIибси сари или багьахъу­рсири. ИлхIелира илини сунела бархьаначиси эфир тIашхIеиб. Гьанна ил блогер туснакълизив сай.
Илала дурарадра, дахъал ил журала анцIбукьуни кадикиб. Гьанбуршисра, Дагъистайзир блогер Фатима Арабовани сунечил рарсряхъибси блогер Лейлачи гьалмагъуни бархьили, ил ритахъиб. ИлхIелира бархьаначиси эфирлизиб чебаахъили.
ХIера, селичи бетиркулил нушала жагьилти. Илди лебилра гаджетуназиб ва телефонтазиб саби. Телефонтани илдас бегIтала ва школабала мер бурцули саби. Илдазибад саби илдани багьуди ва гIякьлу кайсуси. ИшбархIи сегъуна анцIбукь кабиркаллира, адамтани бусягIятал телефон саби някъбази кайсуси. Адам бехIемцIлизи викили виаб, мекъ-сяхIбатличив виаб, шагьарла кьакьалав виаб яра тIабигIятличив бамсриихъули виаб, гьаланачи суратуни ва видео касес къайгъилизиб бирар лебилра. Илдани илди машгьурти видеохостингунази мерладирули сари, чучила багьахъес гьуцIлизиб. БекIлибиубси — адамлизибад «лайк» сархни. Сецадла имцIали сурат хIербарили биаллира, илцадра уктемли башули саби ишбархIила блогерти.
Нушала гIямрулизиб дебали хIейгеси анцIбукь саби жагьси наслу бяркъ ва багьуди агарли кални. Гьалаб нушала улкала политикала бекIлибиубси мурад сабри дурхIнас лайикьси бяркъ бедни, гIямрула къиянси гьунчи дураъни. Илдас лерилра имканти акIахъубтири. ИшбархIи аги дебали барсбиубли саби. Халати къуллукъуначибти хIякимтани жагати гъай дурули сари. Амма илди чIянкIли гъайли кавлули сари.
ИшбархIи жагьилтани гIибрат кайсули саби машгьурти спортсментачибад ва эстрадала гIяр­тис­ту­начибад. Амма бархьси сабира ил? Марлира, спорт гIяхIси ва арадешлис дебали багаласи баркьуди саби. Амма гIибратли бетарули саби арцлис ва сегъунтилра тяхIяр-кьяйда (правило) агарли бирхIути спортсменти. Нушала гIулухъабани машгьурти гIялимти, тухтурти­, инженерти ва цархIил санигIятла адамти балули ахIен. Илдас илди гIягIнилира ахIен. «Треш» ахIен ил­ди. ИшбархIи дахъал сагати дугьби дакIудиубли са­ри. Бахъла мягIна нунира балули ахIенра. Гьанна бекI­лидиубти гIякьлу, духудеш ахIен, цIакь ва давла сари. ХIердизирая хIуша чихъали сабил ишбархIи жавабла къуллукъуначибти хIякимти? Нушала хIуку­матлис хIяжатли саби чули ибси гIеббурцути хIян­чи­зарти.
Нушала адамтира дебали барсбиубли саби. Ляв­би­кIути ва «лампа ушканти» дебали бахъбаили саби.
Гьалаб нушала республикализиб дебали чIума­ти ­гъубзни хIербирутири. Нушала гIялимтачи бучIес дурала улкназибад адамти башутири. Дагъис­та миллатунира гIядатуначирли ва культураличирли декIардулхъутири. Чарбиэсара илгъуна манзил?