Ишди бурхIназив ДР-ла Пра­ви­тельст­вола Предсе­дательла Цаи­бил за­мес­титель А.Карибов бу­зерила ар­хIя­личил Избербаш шагьар­лизи вякьун.
Избербаш шагьарла бекIла къуллукъуни заманалис дузахъуси М.ГIисакьовли, ДР-ла культурала министрла цаибил заместитель М.Телякавовли, ГI.Батирайла уличилси Даргала музыкала-драмала театрла директор Р.Чараковли ва хъулри лушнила хIянчи дируси «СМП» ООО-ла вакилтани гьуниввалтуси илини цIа дикили гIергъи сагабарибси театрла Юрт хIербариб.

10 дусцадхIи духъяндитIунти театр сагабирнила хIянчи бусягIятла замана ахирличи дикили сари. Тамай къулайдарили сари зал, жаняхI, учреждениела цархIилти хъулри. Заллизи 260 адам кабурцар.
«ХIушани балуливан, ишдус Россияли­зиб театрла Дус сабливан багьахъурси са­би. Иличил бархбасахъи, улкализиб театр­тала марафонни бузери бехIбихьили саби. Ил бехIбихьиб Дальний Востокличибад. Нушанира хаслира пикри бяхIчииуси саби ил анцIбукьличи ва байрам гIеббуцесра хIядурлира. Сагабарили гIергъи Даргала театр абхьни республикалацунра ахIи, арагIебли Северный Кавказла гIямрулизибра мягIничебси анцIбукьли бетарар», — цIакьбарили буриб А.Карибовли.
Ил дарибти хIянчила даражаличи разилири. «Театрлизир кадизахъурти ишхIелла гIягI­ни­ахълуми бегIлара гIяхI­та­зирад сари, илдала кумекличил театрла постанов­ка­бицунра ахIи, ахъси да­ражаличир кон­цертуни дурадуркIес имканбикIур. Иличи че, театр урехи хIебирахънила тIа­ла­­буначира балбикибси саби – ил бекI­ли­биуб­сира саби, гьанагарти анцI­бу­кьу­ни сеналра детаэс асухIебирар», — викIи ил.
Гьанна кам-хъяшти хIянчи кали сари, гъамли илдира бекIдарили дирар. Цазаманализиб пагьмула кьукья театр ибхьнила шадлихъличира хIядурбикIули саби.