Гьалабван А.Г.Къараевла уличилси Кубачила СОШ-ла физикала ва астрономияла учитель, «Пагьмучебти дурхIни» ибси проектла руководитель Мурад Асилаловли биологияла учитель МяхIяммад Къараевличил ва дурхIнала бегIтала комитетла председатель ГIябдусамад Кишиевличил барх МяхIячкъала шагьарла музейлизи, ДГУ-ла «Кванториум» технопарклизи, зоологияла музейлизи, «Россия – дила тарих» тарихла парклизи экскурсия дураберкIиб.
Кубачила администрацияла бекI ГIябдусалам Куртаевла кумекличил дураберкIибсири декIар-декIарти предметунала муниципальный олимпиадабачир гьаларти мерани сархибти 15 дурхIялис хасбарибсири ил кIел бархIи бухъянбитIунси балбуц.
ДГУ-ла лерилра факультетунази ва Планетариялизи архIя дураберкIиб кафедрала доцент Мурад Алжанбековла кумекличил. ДурхIнас гIяхIбизур физикала-математикала гIилмуртала доктор, ДГУ-ла профессор МяхIяммадбег Кьагьирович ХIусейхановла планетабачила лекция. ДурхIни тамашабиахъуб урмачилси закли ва БерхIила кабизлизибси дунъяли. ГIур дурхIни физикала ва химияла факультетуназирти аудиториябази ва лабораториябази бякьун. Илар профессор Вали КьурбанисмягIиловли, доцент ГIябдуряхIман Бабуевли ва ГIябдулхIямид ГIисаевли лаборатриябира тамашала гIягIниахълумира чедаахъиб.
Экскурсия дураберкIахъес кумекливиубси ДГУ-ла ректор, халкьла собраниела депутат МуртазагIяли Рабадановлис Кубачила СОШ-ла руководстволи халаси баркалла балахъули саби.
