Ишди бурхIназир «Сагаси наслу» проектла дазурбазиб «Кайтаги» миллатла центрлизиб акIахъубси видеобала творчествола сту­дия­лизирадси риштIаси журналист Эсбет МяхIям­мадова 79 дус риубси поэтесса ГIяйшат НухI­кьа­дие­вачил гьунираиб.

Гьунибаъниличир поэтессани сунела риштIахIелла къиянти гIямруличила буриб. Ил Санчила дурхIнала Юртлизи рикибсири, бегIтазирад мяхIрум­риубхIели.
«Дила дудеш ЧебяхIси ВатIа дергълизив къел-хIерзи агарли веткахъибсири. Неш ребкIибхIели, ну 5 дусцун сарри риубси. Ятимриубси ну дила шилизибси дурхIнала Юртлизир хIеркариубсири. ВерхIел дус риубхIели, школализи ручIес рякьунра, «авла» ва «шула» кьиматуначил ручIира. Мажалисла урга даражала школализир урчIемал класс тамандарили гIергъи, районна судлизи рузес рякьунра ва секретарьла къуллукъ бузахъира», — рикIи ГIяйшат НухIкьадиева.
Ил дахъал дусмазир хIялалли рузули калун, ХIурматла Грамотабачил шабагъатларарибсира гьачамцун ахIенри. Жагьси дубурлан хьунул адамла хIялалси бузери пикрила дураб кахIелун. Хайдакьла райкомла партияла цаибил секретарьли ил КПСС-ла райкомлизи статисткала (кьадарла шайчирти хIялумцIлаби дурадуркIан) къуллукъличи шурратур. КIинайс ГIяйшат Мажалисла районти-ургабси урга даражала школализир мугIяллимли рузули калун, пенсияличи рукьяйчи. Чинар рузалра, ил адамтала халаси хIурматличил ва дигиличил пайдаларикIусири, урхIличи уркIи изуси ва хIялалти хIял-тIабигIятла адам риъни багьандан.
Иш белкIла игитла гъай хIясибли, поэзияличи диги илизир адикьуртири А.Пушкинна, М.Лермонтовла, С.Есенинна произведениебани. Илди халаси иш­тяхIличил дучIутири, ва сарира лукIес хьулрухъун. Илкьяйда сарри ГIяйшат НухIкьадиева нешла мезличил ва урус мезличил назмурта лукIес рехIкарихьибси.
БегI гьалаб илала «Дила ВатIан» бикIуси назмуличил далай Дагъиста радиолизиб зайбухъунсири 1960 ибил дуслизиб. 2004-ибил дуслизиб биалли, илала наз­муртала «Дила гьуни» бикIуси сборник дурабухъунсири ва циила кьанни — «Ну дергъла наслулизирадсира» бикIуси кIиибил сборникра. Илала цацадехIти назмуртала тугъи улкали дявила дусмазиб чекасибси мусибатличила сунела пашмандешли дицIили сари, цархIилти – сунела ВатIайчи ва халкьличи дигили.
Хайдакьла районна бекIлира илала творчестволис чихъси кьимат кабалтули саби. Илала гъай хIясибли, ГI.НухI­кьадиевагъунти пагьмучебти, пасихIти ва рухI­ла­шалси давлала бегIти поэтунала творчество дусмани буркь­бирахъули ахIен, сагати ранганачил ухахъули саби.