МяхIячкъалализиб халкьани-ургабси гIядатласи культурала ва фольклорла «Дубурланти» би­кIуси фестивальли сунела бузери бехI­бихьиб. Ил бетурхуси саби халкьани-ур­габ­си «Культура» бикIуси проектла дазур­ба­зиб.

Фестивальла бекIлибиубси мурад саби гIядатласи миллатла культура машгьурбарни ва ил шайчирти адамти-ургарти бархбасуни уржахъни.
«Хьайдакьланти» бикIуси этнический центрла директор Зубайдат ХIясановала бекIдешлир илала хIянчизартани балбуцлизир жигарла бутIакьяндеш дирули сари. Илдани илар гьаладихьиб хайдакьлантани делкIунти някьиш ва цархIилти устадеш гьаргдирути матяхI.
Кариили, жагали някьишрикIуси Зубайдат ХIясановани буриб:
«Някъла устадешли адамтала мурталра халаси иштяхI алкIахъа. Нушани гьар дус дурабуркIуси фестивальличир дигиличил бутIакьяндеш дирулра. Лебил дунъялизи чедаахъес дигулра нушала урцуйзирад дарибти ваяхI, архIяла гьимиртазирад дирбубти някьиш. Илди гьачам чедаибси адамлис даршдусмала тарихличил гъамиэс имканбикIур».
ГIяхIялдеш дирнила шайчиб хабардерхурси Дагъистан фестивальличи бакIибти гIяхIлас дяхI шалали гьунибиур. Амма ишдус, лебилра дунъяличиб чейхъуси изала тIинтIбиъниличил бархбасахъи, дахъал дурала улкнани ва Россияла регионтани гьарахъдешличи бузуси тяхIярла кумекличилцун илала бузерилизир бутIакьяндеш дариб. БегI гьалаб ил журали бетурхули саби фестиваль, амма адамтас Интернетлизиб ил чебаэс имканбикIур.
Хайдакьла районна бекI ГIялим Темирбулатовли буриб:
«ДекIар-декIарти миллатунала гIяда­ту­ни, культура цахIнадикибси ил фестивальли жамигIятла ургаб чихъси кьимат сархиб. Ра­зихIедиэс хIедирехIе нушала вакилтани Россияла ва цархIилти улкнала миллатунала пагьмуртала шайчирти сархибдешуни лерси майдайчир бутIакьяндеш дирниличи. СенахIенну ил «Хайдакьланти» бикIуси центрла хIянчизартас нушала наслубала рухIла давла районнизибцунра ахIи, дурала мер-мусаличибра тIинтIбиахъес гIяхIси имкан саби».