Ишдуслизиб Борис Наминовичли ГI.Батирайла уличилси Даргала театрлизиб бегI гьалаб сунела спектакль гьалабихьиб. Дагъистаннизиб чебаахъибси Б.Наминовичла хIябэсил спектакль сабри ил.
Россияла ва Калмыкияла искусствола урибси хIянчизар Борис Манджиевла юбилейлис хасбарили, Элистализиб регионти-ургабси «МанджиевФЕСТ» бикIуси театрла мажлис дураберкIиб.
Мажлис бехIбихьайчи, А.М.Амур-Сананала уличилси Миллатла библиотекализиб Б.Манджиевла «Спектакли, дети мои…» бикIуси жузла презентация бетерхур. ХIурматла гIяхIял кьяйда, Даргала театрла гIяртист Мухтар НухIов выставкаличи вякьун.
Мажлисла программа жура-журала регионтазир чедаахъибти Борис Манджиевла спектакльтазибад цалабикилри. Илдала лугIилизиб лебри Даргала театрра. Мажлисла бутIакьянчиби сабливан, халкьани-ургабси культурала бархбас имцIабикIахънилис нушала гIяртистуни дипломтачил шабагъатлабариб.
КР-ла халкьла гIяртист Сергей Бурлаченкони гIяхIси кьимат кабатур ДР-ла бурибти гIяртистуни: Р.ИсмягIиловас, А.Дацциевас, ХI.Рабадановлис ва театрла пагьмучерси гIяртистка ХI.Ибрагьимовас.
Мажлисла дазурбазир театрлис гьуни чебиахъути Москвализибадти гьабкьяти хIянчизартала ва критикунала бутIакьяндешличил спектакльти гьаладирхьниличила ихтилатунира детерхур. Нушала вакилтани, художественный руководитель Мустапа Ибрагьимовла бекIдешлиур, жура-журала устадешла дурсразир, пресс-конференциябазир, гьунибаънибазир ва цархIилти далдуцуназир бутIакьяндеш дариб.
«МанджиевФЕСТ»-ли Россияла дахъал театрти цаладяхъиб, миллатла культурала жураби калахънилис ва регионти-ургабси бархбас имцIабиахънилис сабабли бетаур.
