Владимир Путин, Россияла Президент: «ХIушачи бяхIягибси гьанагарси анцIбукьличил бархбасахъи, пашмандешла ва децIла дугьби кьабулдарая. ГIямрулизивад шалгIевухъун пачалихъла ва жамигIятла урибси хIяракатчи, Дагъистанна марси урши МяхIяммадгIяли МяхIяммадович МяхIяммадов.
Ил мурталра ахIерси крайла кьисматличи, цаванзалантала масъултачи пикриикIусири, илдала уркIби илини гIяхIил иргъутири.
Северный Кавказлис ва арагIебли Россиялис къиянси замана – чIумати гъабзадеш ва рухIла дебадеш чедаахъиб, республикализиб балгундеш ва даршудеш гIеббурцнилизи, улкала мер-мусала абзурдеш калахънилизи халаси пай кабихьиб.
Нушани ил урхIмешули ахIенси, кагибти къиликъуначилси адам – гьарли-марси патриот сеналра хъумхIертехIе».
Сергей Меликов, Дагъистан Республикала БекI: «ГIямрулизивад шалгIевухъун ДР-ла Пачалихъла Советла ХIурматла Председатель, пасихIкар, Дагъистанна ва Россияла гьарли-марси патриот МяхIяммадгIяли МяхIяммадович МяхIяммадов.
Иличилси гьарил ихтилат – гIямрула дарс сабри. МяхIяммадгIяли МяхIяммадовичли мурталра насихIятуни дурутири, итди яра ишди аги-кьяйдализив секьяйдали виэс гIягIнисил баянбирули.
Ил дила гьанбикуназив дагъистанланна бегIлара гIяхIти къиликъуни – бузериличи диги, сабурчевдеш, пасихIдеш ва гъабзадеш — лерси юлдаш кьяйдали кавлан.
Илала гъамтачил децI буртIулра. МяхIяммадгIяли МяхIяммадовичла агри – арагIебли улкалис дебали халаси бетахъри саби».
ГIябдулмуслим ГIябдулмуслимов, ДР-ла Правительствола Председатель: «Дебали хIейгибизур Кавказла политикала аксакал, гьарли-марси гьавкьяна МяхIяммадгIяли МяхIяммадович МяхIяммадов гIямрулизивад шалгIевухъниличила хабар бакьибхIели.
Ил халати устадеш лерси политикли, жавабкардеш дихуси пачалихъла хIяракатчили вирусири, суненира лерилра гIямру ВатIайс къуллукълис харждарибси.
МяхIяммадгIяли МяхIяммадовичли мурталра сунела шила, районна, Дагъистанна, Россияла пикруми-кьасани сунелайчир гьалар чедиутири. Тарихла къиянти бурхIназивра ил сунела халкьла мякьлав вирусири. Гъай агарли, илини мекелли халаси пай кабихьиб Дагъистан социальный бяхIчибизлизиб-экономикализиб гьалабяхI башахънилизи.
МяхIяммадсалам МяхIяммадгIялиевичлизи, илала хъалибарглизи, узи-уршилизи халаси пашмандеш балахъулра».
Жамаладин ХIясанов, РФ-ла Пачалихъла Думала депутат: «Дагъистан вавалибяхъяхъес ибси пикри гIямрула бетуцли бетаахъурси, пагьмучевси бекIдеш диран МяхIяммадгIяли МяхIяммадович гIямрулизивад шалгIевухъун.
Илини республикалис бекIдеш дирутири улкалис гьамадли ахIенси замана. Илди къиянти дусмазиб, улкала декIар-декIарти мераначир къалмакъар-къавгъа ва дургъби адилкьухIели, илис ахIерси республикализиб даршудеш калахъес имканбакIиб. Илини иргъутири халкьла уркIиличирти зугIлуми, ихтилатикIес ва белгити тяхIурти гьаладирхьес балусири. Илди лишанти Дагъистаннизибцунра ахIи, арагIебли Северный Кавказлизибра балгундеш калахъес кумекладиуб.
Нуша мяхIрумдиубра насихIятчилизирад, республикаличи уркIи изуси адамлизирад.
ХIурматла МяхIяммадсалам МяхIяммадгIялиевич ва гъамти! ХIушачил барх децI буртIулра. Илгъуна пергер дагъистанланна шаласи сипат нушала уркIбазиб даимлис кавлан».
Алексей ХIясанов, ДР-ла БекIла ва Правительствола Администрацияла Руководитель: «Нуша лебтасалра МяхIяммадгIяли МяхIяммадович гIямрулизивад шалгIевухъни дебали халаси бетахъри саби. Ил мурталра гIякьлучевси политикала мисалли вирусири, суненира бегI гьалабси мерличи Дагъистан гьалабяхI башахъни кабалтуси.
МяхIяммадгIяли МяхIяммадовлис республикалис бекIдеш дирес кьадарбиуб къиянси замана, амма улкала гьарли-марси патриот сайливан, илини мурталра Дагъистанна халкьла пикруми-кьасани чIумали далтахъутири.
МяхIяммадгIяли МяхIяммадовичла хъалибарглизи ва гъамтази пашмандеш балахъулра. Ил гьариллис кумекбарес къайгъилизивси вирниличила балути нуша лерилра ишбархIи хIушачил дарх децIдикIулра».
Заур Аскендеров, ДР-ла Халкьла Собраниела Председатель: «93 дусла гIямруличив гIямрулизивад шалгIевухъун Дагъистан Республикала Пачалихъла Советла ХIурматла Председатель МяхIяммадгIяли МяхIяммадович МяхIяммадов.
Ил халаси уличилси политик сайри, сунелара гIямрула гьуни ахIерси Дагъистанничил цIацIали бархбасунси. МяхIяммадгIяли МяхIяммадовичла пасихIдешли гьачамцун ахIенри асарбарибси республикала абзурдеш мяхIкамбирниличи, миллатуни-ургарти бархбасуни уржахъниличи. Илди лерилра баркьудлумачи дахъал миллатунарси Дагъистанни ишбархIира пахрубирули саби.
Дагъистан Республикала Халкьла Собраниела депутатунала ва дила шайзибад МяхIяммадгIяли МяхIяммадовичла гъамтази пашмандеш балахъулра».