ЦацахIели детарути анцIбукьуначила пикрирухъасли, «Се бетаэсара нушаб челябкьлализиб?» ибси суал бекIлизиб алкIули саби. Дахъал дарсдешуни кадиркули сари дунъяличир.

УркIи пашманбиэсти хабурти сари нушани гьар бархIи дикьути­. ГIяхIла хабарла камли бикьулра. Мисаллис, дунъяла декIар-декIарти мераначир цIали игути халати ванзурби, вацIурби, вайти излумазибад улхути адамти… Илди хабуртачила бикьухIели, нушачилра сегъуна анцIбукь кабикесара или, уркIи кахбирули бирар. Бараван зягIипикибси адам хапли убкIули сай. Лер дагьардиубли ва жигарчерли тIинтI­диубли сари гьалар агарти дахъал излуми. Селичил дархдасунти илди аги-кьяйда? ХIукумат ва промышленность гьалабяхI арбукьни гIяхIси биалра, цархIил шайчибад ил вайдешлира бетарули саби. ГIяхIти шалубачил къяйли ганздикIули сари илдала вайти шалубира. Гьар бархIи дурадулхъути сагати техникабала, машинабала, ярагъла ва цархIилти гIягIниахълумала лайдикIути нясдешунани гьава нясбирахъули саби.
Селра гIяхIси бурес хIейрар хурегличилара. Адам­тани тукентазирад асили, се-дигара дукули са­ри. Бахъалгъунтани илди, селизирад дарибтил хIер­­хIеи­ли, исули дирар. Ишаб цацабехIти набчил кьа­булхIебикес асубирар. Амма гьалаб дубурла тя­хIуси ва умуси гьавали гьигьбикIули, чули хъумачир да­кIа­хъибти овощунани ва цIедешли букути нушала ха­ла бегIтала гIямруличил цугдуцалли, илди нушаван ахIи се­цадла арали бирил. Гьанна нушани иргъути излумачи­ла илдани итхIели хIебикьи. Бухънакабаай­чи адамти хIербирули бири.ХIера, нясси гьавала ва се­лизирад дарибтил хIебалути продуктунала асарличил, нуша шакалра хIедиркули хьалли, гIяхIцад декIти излуми алкIули сари.
Гьаннала замана улхули саби жагьилти, гьайгьайрагу, декIар-декIарти сабабти хIясибли. Амма декIти излумала кьялшубазибад илдасра берцес гьамадли ахIен. ХIябразир жагьилти адамтала цIелдуби дахъал сари.
Илди лерил анцIбукьуни дебали хIейгестили детарули сари. ЦацабехIтани бурули саби, тIабигIятлис адамтани бируси зарал, адамтачи чарбулхъули саби или. Илкьяйда хIебиахъес, нушала арадеш ва гIямру мяхIкамдарес кьасбирес гIягIнили саби нушаб. Секьяйда или гьанбикалли, бегI гьалабси яргализиб гьанбушес вирар адамтани лайдикIути жярга-зекъличила масъала. Бахъалгъунтани илди лайикьси мерличи лайхIедакIили, хъали-алав, гьунила дублар далтули дирар. Урхьула дубличи бамсриахъес укьялли, адам висикайэси анцIбукь чебаэс вирар. Чинаралра лайкадакIибти нясдешуни. Илгъуна аги хIебиахъес кьалли нушани дирехIе. ВегIла мер-муса умули ди­хIес хIейрусив адамли?
Кадирхъути галгубачила гъайдикIахIелли, цаца­дехIти мераначир халати вацIурби абзурли чIянкI­ка­дарили кадалтули сари. Илар хIердирути жаниварти ва арцанти бекIлил деткайхъули сари. ХIера, сегъунти зарулти дирулил адамли сунес ва сунела дурхIнас балули-балули.
Илкьяйда хIебиахъес багьандан, нушаб нушала гьа­рил баркьудиличи чекадизес чебиркур. ТIа­би­гIятличи ва нушала арадешличи нушани хIеруди хIе­ба­ра­хIелли, аги вайтIабиркур.