Ишди бурхIназиб «Дагъистан» РИА-лизиб Каспийск шагьарла урхьула дубличирти мер-муса гьа­­ладяхI дикнила дазурбазиб, илар бамсри ихъути мерани, ишхIелла да­ра­жала гостиница ва аквапаркличилси «Caspian Plaza» бикIуси апарт-отель тIаш­балт­ни­­личил акIубти дархибти аги-кьяйда гIя­чихъдарес ибси мурадличил «Каспий Плаза» ООО компанияла ва­килтала бу­тIа­кьян­дешличилси пресс-кон­ференция бе­тер­хур.

«Каспий Плаза» ООО-ла директор Заира Ширинбековани бурили кьяйда, шагьарла жамигIятла ва чула ургаб бижгурси аги акIубсири, челябкьлализиб комплекс лушуси мер-мусаличиб хIяри тIашбатурли гIергъи.
«Нуша жамигIятла вакилтачил чуйнара гьунидаира ва нушала проектличила ил­дази багьахъурсири. Гьала-гьала илди нушани дурутачи разилири, гьар секIайчи кьабуллири. Лебтасалра аргъес чебиркур, Каспийсклизиб гостиницала комплекс барнили шагьар туризмала шайчиб цархIилтала пикри битIикIусили бетарниличила ва илала чебаъ жагабирниличила. Илди мер-мусаличир шинна хIязаначилси парк (аквапарк), дельфинтала шара (илди хIердируси ва руркъуси), хIязла гIягIниахълуми (аттракционти) тIашдатес пикри леб. Лерил секIал хъалибаргличил барх бамсри ихъахъес дирути сари. Илала дурабад хъумартес асухIебирар, Каспийсклизиб хIербирути халкьлисра сецад хIянчила мерани алкIулил. Гьанна аги-кьяйда дарсдиубли сари, нушанира иргъули ахIенра сен цацабехIти шагьарланти комплекс тIашбалтниличи къаршили дурабухъунтил», — рикIи З.Ширинбекова.
Илини буруливан, ишбархIилис 1,8 гектарла ванзаличиб апарт-отель тIашбатес чузиб ихтияр леб, илала чебкад гIягIнити адамтачил вягIдалабиубти саби. «Проек­т хIясибли абзурси комп­лексли 9,5 гектарла ванза бурцули саби. ЖамигIятла хIя­ракатчиби ва Каспийск шагьарла ад­министрация саби-ургаб цугбикес, вягI­да­ла­биэс бирули ахIен. Ил багьандан ванза бузахънила черкадти низам-кьяйда ва генплан гьаннара тасдикьдарили ахIен. Ну­шабра проект цахIнабли гьунчибушес имканбакIили ахIен», — рикIи ил.
Проект хIядурбируси «Авилон» бикIуси компанияла вакил М.Расуловли 4,5 гектарла ванзаличиб инвесторлис (арц кадирхьуси предприниматель) республикала халкьлис ва шагьарлантас анцIбукьни чераркуси (хIяз-хIузла) парк барес дигниличила аргъахъиб. «Илаб хIязла гIягIниахълумачилси (аттракционти), анцIбукьни чераркути ва коммерцияла белшаначилси халаси парк тIашбатес пикри леб. Илкьяйдали хIязла анхълизиб халаси чарчари (алавла хIербарахъес адамти ахъбурцуси) баршес кьас саби», — викIи М.Расулов.
Каспийсклизиб хIербирути халкьла шагьарла хозяйствола шуртIри гIердурцути кьялубазир масъулти акIес асубирару ибси суайс (сенахIенну илгъуна халаси комплекс тIашбатниличил дарх халаси кьадарлизир хутIла, шинна ва цархIилти сурсатуни харждирути сархIели), М.Расуловли лерилра илди секIал хIисаблизи касибти сари или буриб. «БекIбархIилизиб комплексла проект пикрибирухIейчибадал, пачалихъли шагьарла инфраструктуралис арц декIардарибти сари. Илди мер-мусаличи газ, шин, хутI леркути сари. БусягIятла замана проект хIербирули саби, ва нуша ил программализи кадерхес багьандан, пачалихъли шагьарла хозяйствола инфрастуктура сагадарнилис 250 миллион къуруш кадихьес гIягIнити сари. Ил шайчир шагьарлис гIяхIдешуницун сари дирути», — викIи ил.
Проектлис цахIнарли 3,2 миллиард къуруш харждирули сари ва хIянчила сагати мерани алкIахъули сари (147 мер).
Пресс-конференция журналистунала суалтачил даимбиуб. Бурес чебиркур, журналистуначилси гьунибаъниличи Каспийск шагьарла администрацияра жибарибтири, амма илди балбуцличи хIебакIиб.