Дагъистанна премьер-министр ГI.ГIябдулмуслимовли школализиб бучIути дурхIни буцIарси беркайчил бахнила шайчибси хIеруди цIакьбарахъес хъарбариб. Иличила балахъули саби республикала Правительствола пресс-службали.

Премьер-министрли бурни хIясибли, дурхIни балбикибси беркай белкъайчи балхни пачалихъла политикала социальный бяхIчибизлизиб гьалабяхI башнила хIекьлизиб мягIничебси масъала саби. Ишдус Дагъистанна мерла хIукуматла органтас, дурхIни буцIарси беркай матъал бахахъес ибси мурадличил 2,39 миллиардличирра имцIали къуруш декIардарибтири. Илдазирад 438 миллион харжхIедарили кали сари.