ЗАМАНА - Игитуни хъумхIертехIе

Нушала уркIбазиб ка­лахъес ва чеал­кIу­си наслулизи чула Игитуни багьахъес ка­би­за­хъурси бархIи леб кален­дарьлизиб. Ил саби декабрьла 9 – ВатIа Игитунала БархIи. Ил 2007-ибил дуслизиб каби­за­хъурсири ва гIергъити дус­мазиб бекIлибиубси шад­лихъван дурабуркIуси саби, сена­хIенну игитуначила ну­шани хъумартес асубируси ахIен. Чи сая Игит? Ил сунела жан мяхIкамхIедарили, ВатIан батахъес яра къияйзи икиб­си­лис кумекла някъ гьабурцуси адам сай.

Игитуни хъумхIертехIе

Игитунала БархIилис багъишлабарили Сергокъалала районнизибси бекIлибиубсигъуна биб­лиотекализиб балбуц дура­беркIиб. Илар бутIакьяндеш дариб Украинализиб бетурхуси хасси балбуцлизиб дявила чебла ахъибтанира. Илди сабри Ша­мил Рабазанов ва ГIямар ГIялиев. Нушала дурхIни ВатIан ба­гьандан секьяйда бургъулил ва чеалкIуси наслулисра ВатIан дигахънилашал бяркъ бедес хIяжатли биъниличила цIакьбарили буриб илдани.
Тарих ихкьяйда кабизурли саби, ишбархIила манзиллизиб нушала гIярмияла цIакь чебаахъес жагьилтачи хъарбикни.
Балбуц бехIбирхьули районна бекIла заместитель Б.Ма­жи­дов гъайухъун ва СВО-ла бу­тIакьянчиби, илдала хъалибар­гуни гIебурцнила шайчиб район­низиб халаси хIянчи ду­ра­буркIули саби или гьанбушиб.
«Нушала уршби – гъабзадешлис, урехиагардешлис ва игитдешлис бикьри саби. Ва­тIан батахъес дурабухъунти, гIяхI­гъабзадешла къиликъуни чузир лерти илди лерилра замунтазиб цархIилтазибад декIарбулхъутири», — викIи ил.
«Нушани ишбархIи ЧебяхI­си ВатIа ва Афганистанна дургъ­би гьандиркахъулра. Ит­хIел­ла манзилла Игитуначила хъумуртули ахIенра. Дахъал дусмала духIнар кадиркути анцIбукьуни цугдурцухIели, Ро­ссиялантала хасиятуни, хIял-тIабигIят, рухIла кабиз дарсхIедиъни ва заманалис му­тIигI­­хIедикIни чебиулра», — викIи районна ветерантала советла председатель М.Мя­хIям­­мадов.
КIинайс гъайбухъун: Сергокъалала 1-ибил школала дарган мезла му­гIял­лим П.Мусаева (илини сунени белкIунси «Къиянси манзил» бикIуси назму белчIун), районна жагьилтала къуллукъунала шайчивси специалист М.Мусаев, ХIурхъила шила администрацияла бекI М.ГIисаев, поэт К.Рабазанов, районна куль­турала-бамсри ихънила Центрла хIян­чизар И.ГIялибеков.
СВО-лизир бутIа­кьян­деш дирули алхунти гьанбиркахъули, минутлис лехIдеш багьахъур.

Прочитано 302 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na fotoФотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций. Регистрационный номер: Эл № ФС77-78978 от 20 августа 2020 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 66-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
  ok  vk  rss
Top