ГIергъиси замана гьарил секIал гьаладяхI дашули хьалли, вегIла нешла мезличи пикри бяхIчииути камбикIули саби.
ЦацабехIти илди деткайхъур бикIулира бирар. Бурес кьалли сегъуна-дигара пикри вирар, амма бегIлара вайси, бегIтани чула дурхIнази мез хIедалахъни саби. Нешла мез бикIули хьалли, бахъалгъунти нешани чула дурхIначил урус мезличил саби гъайбикIути. Илгъуна баркьуди илдани культуралашал гьалабяхI арбякьунсилизи ва дагьрила ахъдеш иргъахъусилизи халбирули бургар. Культурара дагьрира лертани бегI гьалабси яргализиб вегIлизира нешли дяркъяхъурти мезличи чула дурхIнира бурсибиру. ЦархIил сегъуна шайчив дурхIя мурхьти багьудлумачи вяркъес вируси, илини вегIла нешла мез далули хIейалли. Наб кьалли гьанбиркур даргала мезличир жагати мез дунъяличир чилалра хIедургар или. Пикрибараягу сецад жагали зайдикIулил неш, урши, ВатIан, мардеш, гъабзадеш, талихI, ургуба, вавни… ибти дугьби. Илди ва цархIилти дарган дугьби тикрардируцад уркIи шадбирули саби, гьав ахъбирули саби, алавси дунъяличи ва гIямруличи диги имцIадикIули сари…
Селичилра хIерхIеили, нешла мез гьаладяхI дашахъес къайгъилизибтира камли ахIен республикализиб. БегI гьалабси яргализиб илдигъунтала лугIилизиб гьанбушес вирар школабазиб бузути нешла мезла мугIяллимти. Учительти ва дурхIни мезличил дархдасунти далдуцунази мурталра алавбурцутазирадли сари МяхIячкъалала «Багьудила управление» МКУ-ла хIянчизар Рукьият Рабазановнара. ХIера, гьалабванра МяхIячкъалала «Цаибил номерла гимназия» МБОУ-лизиб илини шагьарла школабазибти нешла мезличил ункъли бегIбиубти ученикуни пагьмучебтигъунти мугIяллимти ва мезанала хIурматбиранти цалабяхъиб. Ил Дагъиста поэтунала школала программализир агарти произведениеби ученикунани ункъли дурнилис хасбарибси конкурс сабри.
Гимназияла руководстволи балбуц жагали бехIбихьиб. Булхъути ва далайбикIути дурхIнани заллизи кабиибти разибирахъулри. ГIур республикала лерилра миллатунала мезанала вакилти классунази бякьун.
Дарган мезла конкурслизир бутIакьяндеш дарес цалабикилри тах шагьарла школабазибадти 12 урши-рурси. Илдани назмурти дучIухIели, уркIи пахрули бирцIулри, сенахIенну гьарил дурхIя къайгъилизиври гьалабси мерличи дуравхъес. Илкьяйдали гIяхIтигъунти 10-11-ибти классунала дурхIназибадли чеббикIибтала уми гьандуршис. Илди саби 10-ибил класслизибадти цаибил мерличи лайикьрикибси 17 ибил номерла школала ученица Аминат МяхIяммадова, кIиибил мер сархибси 53 ибил номерла школализирадси Мадина ГIяммаева, хIябъибил мерличи лайикьрикибси цаибил гимназиялизир ручIуси ПатIимат Тукуева. 11 ибил класслизиб бучIути: 42 ибил школализирадси ПатIимат Мамаевани цаибил мер сархиб, 33 ибил школализивадси Мансур КьурбабяхIяммаевли –кIиибил ва 56 ибил школализирадси Зумруд ГIябдулвагьабовани – хIябъибил.
Цаибти мераначи лайикьбикибти Аминат МяхIяммадовала нешла мезла учительница сари СягIидат БяхIмудова, ПатIимат Маммаевала нешла мезла учительница Зубайдат ХIусейнова сари. Илди кIелра учительницани чули кабирхьуси предмет ункъли балниличибли ва нешла мез дурхIнази дяркъяхъес чула цIакьанира багьудлумира ахIерахIедирниличирли сари илдани бучIахъути ученицабани гьаларти мерани сархибтира. Илкьяйдали нешла мез дурхIнази ункъли руркъяхъули ва гьаладяхI дашахъес къайгъибиралли, илди детхIейхъниличи умутбихьесра вирар.
