Гьалабван Абу-Да­­би­лизиб ца­ца­ли бир­хIян­­т­ала гIямрулизиб мягI­ничеб­си анцI­букь кабикиб. Илар ММА жу­ра­ла абзани детерхур.

БекI­либиубси – нушала рес­публикализивадси ХIя­биб НурмяхIяммадов амери­ка­ла спортсмен Джастин Гэт­жиличил вяхIибсири. Ил бекI­либиубси ва лебилра дунъяличибти спорт диганти сунечи хIерси абз сабри. Лебилра пикрумазибри — имкан бакIесара нушала спорт­с­меннис чемпионна у бихIес? ХIябибли сай гьарли-марси ва чисалра удихIевикибси чемпион виъни кабизахъур. Илини спортла 29 абз дурадеркIиб ва лебтазибалра чедибдеш сархиб. Ил журала абзаназиб ил гьарли-марси сархибдеш саби. Сунела гъайлизиб ХIябибли сай гIевурцути адамтас халаси баркалла багьахъур ва сай ММА-ла абзаназивад аркьни багьахъур.
Иш гьакIлис дагъистанланнис дебали къиянси абз сабри. Гьалабван декIли зягIипвикили, илала дудеш ва тренер ГIяб­дулманап НурмяхIяммадов гIям­рулизивад шалгIевухъун­сири. Гьарли-марли, гьарил адамлис вегIла гъамси адам вебкIни декIси бяхъли ва халаси децIли бетарар. Сунела дудешлис урши чемпион ветаахъес дигусири. Дудешла мурад ХIябибли бетерхахъур.
Нушала республика мурталра машгьурсири гъубзначибли, гIяхIти спортсментачибли, устначибли… Амма ХIябиб НурмяхIяммадовли нушала адамтас сагаси спортла жураличи азирти дурхIнала диги адикьур. Даршани дурхIни заланази башес бехIбихьиб. Дила пикрилира, нушала дурхIни спортла заланазиб биалли гIяхIси саби, кьакьализиб ца ити ласхIебикIули.
Спортсмен ветаэс гьамадси ахIен. Ил арагIеб гIилму саби. ЦацабехIтас се лебси хункIа гьакIикIес или гьанбиркули саби. ХIякьикьатлизиб биалли, спортлизибра се-биалра сархес багьандан, бекIла мехIе дузахъес хIяжатбиркур. Хун­кIачил бузес бирути бахъал саби. Чемпионти биалли — дебали камли. Дагъистайзиб сагадан спортла кьадри ахъбирнилизи нушала хабардерхурти чемпионтани халаси пай кабирхьули саби. ХIера, гьалабван азадли мушулбашнила Россияла чемпионат бетерхурсири. Иличир Дагъиста спортсментани 12 мургьила медальлизирад 9 сархибтири. Пикридухъенаягу хIуша: урчIемал цаибти мер. Нушала спорсменти саби Европала ва дунъяла чемпионатличира башути.
Наб бурес дигуси цагьатIи секIал леб. Чемпион ветаэс дигни дебали гIяхIси гьуцI саби. Амма нушала жагьилтани балули ахIен: бекIлибиубси – вегIличивад вегI чедивикни биъни. Сунезир лерти вайти къиликъуначивад чедиикес, яхIра адаб-хIяяра гьунарличил дархдалгахъес чебиркур. Спортсменнара бегIлара гIяхIти шалубазибад ца саби гIяхIси бяркъ лебни. Халасила хIурмат бирни, виштIаси гьимхIеркIахъни…
ЦацахIели бяркъличила хъумуртули саби нушала адамтани. ИшбархIи ну биштIати халатачил жал­бикI­нила, гьести гIямрула адамтала хIурмат хIебир­нила анцIбукьунас чуйнара бикьрили ветарулра. Сабаб – чула дурхIнас бегIтани хъулиб бяркъ хIелугни. Ца адам школализив сунела дурхIя бекIварес вирули ахIенра, хIушани вяркъая викIули чеира. Ил бархьсив? Чис гIягIниси ил дурхIя, сунес хIяжатагара биалли? БегIлара халаси нушала хазна нушала биштIатазиб саби.
Бахъалгъунти Западла улкнас гапбикIули саби. Нуша биалли илдачир дебали декIартира. Нушани нушала бегIти бухънабала Юртлизи бурхьути ахIен. УргIебли, ил баркьуди цIахсилизи халбируси саби. Нушани гIяхIял гостиницализив валтуси ахIен. ГьатIира дахъал мисалти дурес вирар. Ну вирхулра, гьаннала гIергъира илкьяйдали бирниличира.