Сунечибад берхIи булхъухIеливан, мурталра дяхI шаласи, уркIила разидешли алавчарси дунъя ря­хIят­бирахъуси ТубхIят МуртазагIялиевна Зургаловас Дагъиста халкьла поэтла у беднила хабар, дубурла шилизирси набчи дай дуги баиб. Хабарли дебали разирарира, набчил сунела разидеш бутIнилис ТубхIятлис баркалла багьахъурра.

Вихърила школала учитель, «Лачин» журналла редколлегияла член, дурхIнас жагати назмурти лукIуси ХIясайни ГIяппаевла юбилейла балбуцличир, бегI гьалар ТубхIятличил ну тянишриубсири. ТубхIятли ДГУ-ла студентхIелила юлдашдеш ХIясайни ГIяппаевличил, ГIяйша Кьурбановачил къябхIедердахъили дахъал дусмазир ахIерадарилри. Даргантачил рарххIелира ил сунела кьумурличир сарри, сари-алавси дунъя разидешла, ряхIятдешла гьавли бирцIахъулри.

2024 ибил дусла мартличир, нуни дарган мезличи шурдатурти ТубхIят Зургаловала чумал назму «Замана» газетализир дурадухъунтири.

Илди назмуртазиб ТубхIятла уркIи нешличи дигили ва хIурматли бицIили саби. Сунела рурсби илис вавни ва берхIила шала бетаурли, бахъ ахIерли саби. Узби абацIибхIели илдас беркес кьацIван уркIи гьалабихьес, держес шарабван хIулбазирти дигила, разидешла нургъби гьаладихьес рирули сари. Сунела гIямрула вархкьячил буртIуси зимла манзилра илис дебали дурхъали саби, иличил рарх риэс багьандан унза кьяпIдарибмадан ил чевиуси улкьайличи ретиули сари, мурул аркьуси гьунчив Аллагь хIелуси адам къаршихIейкахъес рулгули сари. ТубхIят Дагъистан ва илала игитунала гъабзадеш черяхIдарести дугьби даргес рируси ва балуси халаси поэт сари.

Гьарил сагаси жуз бучIухIели, сегъуна-биалра сагаси пикри дагьрилизиб кавлули бирар. Лебил дунъяла халкьли валуси, Бразилиялизивадси писатель ва журналист Пауло Коэльола «Брида» бикIуси жузлизиб гIергъиси пикри баргира: «Аллагьличи аркьуси бегIлара къантIси цаибил гьуни балгализиб саби, кIиибил гьунира тяп цаибилван бархьси ва къантIси саби – ил разидешлизиб саби». Ца ити ахIенри Расул ХIямзатов викIуси: «ТубхIят разидешла министерство сари».

ТубхIятлизир парчдикIули, алавчар ряхIят­бирахъули, балгнира разидешра лер. Илала мякьлав виэс дебали дигесли саби, уркIила дигиличил, гIяхIти хIял-тIабигIятличил илини адамти разибирахъули сари, жагати дугьбачил, уркIиличир калести сагати пикрумачил дунъя давлачеббирули сари. Ил гьарли-марси халкьла поэт сари.

Замана газетала агьлули ТубхIят МуртазагIялиевна Зургалова Дагъиста халкьла поэтла уличи лайикьрикниличил мубаракрирули сари. Илис гIурра дахъал гьарбизуни, дунъяличир лерти дахъал гIяхIдешуни дулгули сари.

Муъминат Хаттаева