Наб гьалабла манзиллизир хIерриэс дигахъира кьалли. Гьалабла ибхIелира нушала бегIти биштIаси заманализир: шишимти, дявти, вайти излуми, гIурра цархIилти мягIниагарти далдуцуни агарси.
ИлхIели халкь-ургар даршудешра разидешра дири. Узи-уршила дурабад, гьарил адамла декIар-декIарти мераначиб гIяхIли бири. Бирусиличи алавтала кьясдеш, гIясидеш, вайдеш хIедири. Замана гьар секIайзибад ункъли хIебиалра, ишбархIиван паргъатагарси замана ахIенри. ЖагIялла бархIиличи адамти бирхули бири.
Нуша диштIаси манзилра вайси сабри хIерикIус, сенахIенну ишбархIила дурхIнани нушани чебаибсигъуналра гIяхI чебиули ахIен, нушани дирули калунтигъунти хIязти илдани, гьеч, далули ахIен. Телефонтази бухIнакабикили, илдани дурхIядешла тIягIямра хIебалусиван кабилзан.
ГIягIниагарти шутIни-къунби датурли, лебилра хIялалси бузерилизи ахъили, колхоз-совхозуназиб бархIиахъайчи бузутири. Лебилра халкь илцад гIяхIти хIебиаллира, бахъалгъунти вегIла гъамтиван цаличи ца дугьабилзули бири. Духутала ургав ца мехIур виаллира къиянси масъала ахIен, къиянни бирар мехIуртала ургав ца духусицун виалли – илкьяйда бикIар халкьлизиб.
Сепайда, ардякьунти дусми ва замунти чардарес хIейрар… Гьанна нушаб кали саби чIянкIли илди гьандуршес ва гIяхIсиличи дирхес.