Ахъти дубуртала, мурхьти къадурбала ургарадли ва шурмала мер-мусаличир машинаби дашахъес дарибти гьундури чедиухIели тамашахIейэс хIейрар. Мурт ва чили дарибтира илди или даим пикририкIусири ну. Илис жавабли биахъубли дила хала бегIтани бурусири: «Гьалар гьаннаван машинаби дирути ахIенри. Унцала ва умхIела кумекличил гечдирутири гьарил секIал. ГIур шилизи машинаби леркниличила багьахъурсири ва лебилра шила шанти дурабухъи, итхIели гьундури дирутири илди дашахъес багьандан. Халкьлизи хIякимтани, гьарил хъалибаргличи гьунила бутIа хъарбарили, хIянчи дирахъутири, цабехI ибкьли бузули, цархIилти азгъинбирухIели бииши. Илкьяйдали халаси къиян кабихьили, шурми мутIигIдарибти сари дубурлантани…»
Дургъбас гIергъити къиянти дусмачи хIерхIеили, дугIахъарлантанира цархIилти дубурлантаниван дахъал гьундури дарибтири. Дубуртазир имцIаливан ца лугъатличил гъайбикIутала ца ши биалли, ДугIахъарла шила Советлизи гехIел ши кадурхутири. Ил багьанданра гьундури дахъал дирес чевкъусири.
ИшхIелла манзиллизир гьундури ремонтдирниличи илцад пикри бяхIчихIейъни гьариллис якьинси саби. ДугIахъарланти чили-биалра гьундури ункъдарайчи хIерли кахIебиили, чула цIакьаначил илди сагадирес бехIбихьиб. Гъани ХIямидовли, Руслан Рабадановли ва Багьаутдин МуртазагIялиевли арцличил кумекбариб ва гъягъя асиб. Руслан Исиновли 600 литр саляркала бедиб. МяхIяммад Рабазановли сай-вегIти КАМАЗ машиналичил, бульдозерличил ва экскаваторличил гъягъя гьундурачи тIинтIдариб. Илис кумекличил музаухъун механизаторли дахъал дусмазив узули калунси Рабазан АмирхIямзаев.
ДугIахъарла шилизи ва ил шила администрациялизи кадурхути Хулабарк, Сумия, Хъиша, ГIузрая, Мукрисана, Мурклахъяри, СурсалабачIи махьурбазир гьундури дирнила хIянчи жигарчерли детерхур. Гьундури къулайдирнилизир жигарла бутIакьяндеш дариб Хулабарклизибадти МяхIяммадрасул Кьурбановли, АмирхIямза АмирхIямзаевли, СягIидуллагь Рабадановли ва цархIилти махьурбала жамигIятли. Илдас уркIи-уркIилабадси баркалла балахъули сай «ДугIахъар» шила Советла председатель МяхIяммад Адамовли. Илини къайгъни дакIудирули сай дугIахъарлантала гIямрула ва яшавла шуртIри ункъдиахъес багьандан. Илала сипта хIясибли сарри 50 километрла гьундури къулайдирнила хIянчи ункъли дурадеркIибтира.
ДугIахъарланти бугIярдешли чябхъинти дехIдихьайчи федеральный кьадрила ва шимази башути гьундури къулайси агиличи дикахъес бажардибикиб. Гъягъяла-гъумла хасси гъудурмай какьурти гьундури гьанна сегъуна-дигара манзиллизир машинабас урехиагартили детаурли сари.
ПатIимат Кьурбанова
