ГIялиева ГIябидат ГIялиевна акIубсири ЧебяхI Хъарш­лила шилизир 1941 ибил дуслизир. Илала бегIти ГIяли ва Хамис ЧебяхI Хъаршлила шилизиб бехIбихьудла школализиб учительтили бузули калунтири. ГIябидатла бегIтани верхIел урши-рурси абикьуртири, гIяхIси бяркъра бедили, лебтазилра багьудира касахъили, гIямрула гьунчи дураибтири.
ГIябидатли бехIбихьудла классуни Хъаршлила школализир делчIи, гIур Кулила районна КIагIяла шилизиб гIяхIти кьиматуначил школа таманбариб.
1962 ибил дуслизир ил Буйнакъск шагьарлизибси медучилищелизи карерхур ва 1965 ибил дуслизиб ил хъараахъур, акушеркала санигIятличи регIриуб.
ГIябидатли сунела бузерила гьуни бехIбихьиб Кьассагумахьилизибси медпунктлизир рузули. Илини 12 махьилизибти адамтачи хIеруди бирусири. ИтхIели машинабира агартири, рашули рашес гьамадси ахIенри, ца махьилизирад цархIилти мер-мусаличи зягIиптачи хIеруди барес. Илкьяйдали биалра, ГIя­би­дат хIя­жат­би­кибси мерличи риусири ва жавабкардешли­чил рузусири. Са­ри рузути мер-му­са­личиб ха­ласи уму­деш ва иб­гиб­деш диру­тири.
ГIяхIцад дусмазир ил рузули калун ЧебяхI Хъарш­­­лила шилизибси медпунктла заведую­щая­ли. ГIяби­дат адам­тачи ур­кIе­цIи­личил хIе­руди бируси адам сарри. Сунечи дугьабизурти зя­гIип­тала изала бусягIят белгибарес балусири, илдас гIягI­ни­си дарман лукIи, уколти дири, капельницаби кадил­захъи. ГIябидатли сунела шилизиб ва алавчарти ма­хьурбазиб хIербирути адамтала халаси хIурмат сар­хибсири. Дугели биаллира сунечи дугьавизурси адам чархIейри, илис сунени рирусигъуна кумек гIеб­би­ахъи.
Илини школала бучIантачил ихтилатуни дирутири ара-сагъти гIямру диахъес багьандан, сегъуна умудеш барес гIягIнисил ва цархIилтира багаладиэсти насихIятуни дурули. ГIябидатли гIяхIти кьиматуначил арадеш мяхIкамбирнила Министерстволизиб барибси аттестация бетерхахъур ва «Лечебное дело» би­кIу­си санигIятла категория ахъбуцили, сертификат ка­­сибсири.
ГIябидат ГIялиевна «Ахъушала район» МО-ла администрацияла шайзирад чуйнара ХIурматла Грамоталичил шабагъатларарибсири.
Илини сунела гIямрула вархкьячил барх хIябал дурхIя абикьур. ДурхIнала дурхIнира, илдачибад акIубтира абикьахъес кумекбирусири. Илала ца уршила рурси, сунесра ГIябидатла у бихьибси, хала нешлагъуна санигIят касили, Каспийск шагьарлизибси медицинала колледж таманбарили, сунела хала неш рузули калунси медпунктла заведующаяли рузули сари.
ГIябидат ГIялиевна ишди бурхIназир гIямрули­зирад аррякьун, бунагь-хатIа урдуцаб сунела…
(БелкI хIядурбарахъес кумекбариб ЧебяхI Хъаршлила библиотекала заведующая Па­тIимат ГIямаровани).

Сабият ГIябдуллаева