Хайдакьла районнизиб гIебшнила призывла кампанияла бузери даимбирули саби. Россияла Федерацияла Ярагъладарибти ЦIакьаназиб къуллукъ барахъес жагьилти бурхьнила балбуц график хIясибли бетурхули саби.

Ил балбуцла бузериличила буриб Дахадаевла ва Хайдакьла районтала дявила комиссариатла призывла отделениела начальник МяхIяммад Пашаевли.

«Октябрьла 1-личиб районна призывная комиссияли сунела бузери бехIбихьиб. ХIянчи хIяжатси тяхIярли бетурхули саби. ГIярмиялизи ва флотлизи жагьилти арбашули саби. ИшбархIилис къуллукъличи 70 адам бархьили саби. Декабрьла 13-личи бикайчи кIелра районнизибад 100-личибра имцIати жагьилти ила бурхьес пикри саби», — викIи ил.

МяхIяммад Пашаевли буриливан, гIярмиялизи имцIаливан жибирули саби чебяхIси даражала ва урга даражала санигIятлашалси багьуди лебти жагьилти. Илкьяйдали машина бикес балути ва  В, С категорияла ихтияр лебти.

«РФ-ла мер-мусаличибцун саби илдани къуллукъ бируси. Сагати регионтази ва СВО-ла мер-мусаличи гIярмицуни бурхьути ахIен. Ил багьандан заманаличиб военкоматлизи дугьабилзахъес лебилра призывникунази тиладибирулра», — чеимцIабариб М.Пашаевли.

Хайдакьла районна администрацияла пресс-служба