Адамла уркIи хIулбуркIухъути бекIахъудила гIямрулизир дахъал лишанти лерти сари. Илдазирад цацадехIти гIямрула делхъхIеделхъути бутIнира детарули сари. Илдигъунти адамла уркIи разибирахъути ва шадбирахъути далилти сари – делхъ, макьам ва далай. Дарган далайли сецад нуша талихIчердирулрая, пикридухъенаягу. Жагаси макьам бяхъибхIели, кьяшми сарицун дулхъес дехIдирхьули дирар, амма гьарил далайчини жагаси далай белчIес ва музыкантли макьам бяхъес балуси ахIен. Ил гьарли-марси, чеббикIибти адамтас ЧевяхIсини бедлугуси халаси пагь саби. ХIера, иш макьала илгъуна пагь сунезиб лебси вахъхIила машгьурси дарган далайчи ва пегер макьамчи, ДР-ла культурала урибси хIянчизар ХIямид СягIидовличила саби. ХIямид МяхIяммадович хIевалуси адам Дарга-Дагъистайзив хIергар.
СягIидов ХIямид МяхIямадович акIубси сай Сергокъалала районна ХIурхъила шилизив 1956 ибил дуслизив январьла урегличив, ЧебяхIси ВатIа дергъла бутIакьянчила хъалибарглизив. ХIямид МяхIяммадовичла хIябал дурхIя леб. Илала халасигъуна урши СВО-ла бутIакьянчи сай…. ВиштIахIелил далайличи ва макьамтачи диги акIубси илини 1974 ибил дуслизиб ХIурхъила урга даражала школа таманбарили гIергъи, Дагъиста Пачалихъла Институлизибси музыкала факультетлизиб белчIуди даимбарибсири. Илабси белчIуди хъараахъурхIели, цаэсил дус Карабудагъкентла районна ГъурбукIила шилизиб ца дус музыкала мугIяллимла хIянчи барибсири. КIинайс биалли, сунела шилизи чарухъунсири ва илабси школализирра музыкала дурсри кадирхьутири. 1979 ибил дуслизиб ХIурхъила шила культурала Юртлизиб бехIбихьибсири илала тамашаласи бузерила гьуни. ЧеалкIуси наслулизи даргала халкьла культура, далайла искусство, макьамти гIерасахъес ХI.СягIидовли халаси хIянчи бариб ва бусягIятра бирули сай. Ил багьандан наслубала бархбас калахънилизи мягIничебси пай кабихьибтазивад ца сай дикIесра илис асубирар. Районнизирти пионертала Юртлизир ва искусствобала школабазирра дурсри кадирхьутири илини. Шилизибти дурхIнас макьамтала ва далуйтала кружокуни, устадешла дурсри дурадуркIули вирар. Дахъал дусмазив ил «Дубурланти» бикIуси ансамбльла ва ХIурхъила шилизибси Россияла халкьла гIядатласи культурала Центрла художественный руководительра сай.
ХIямид СягIидов Къяба-Даргазив бегIлара урибси далайчи ирусири. Шила шантани бурули кьяйда, гьалабла замана телефонти агархIели, ил мукърачи живарес багьандан, алавти ва дурала шимазибад бахъал адамти машинабачиб ва хьурали башутири.
ХIямид МяхIяммадовичли бяхъибси жикьила тIамали уркIила бегIлара мурхьти гьимирти зимдулхъахъули дирар. Сунела ахъси ва чихъси тIамали далай белчIалли, даргала дубуртазиб гIеб-гIебалгьусиван билзан. Гьарли-марли ил ЧевяхIсини бедибси тамашаласи пагь саби. Жикьицунра ахIи, даргала халкьла лерилра музыкала ваяхI илини дирхъули вирар.
ХIямид МяхIяммадовичли жигарла бутIакьяндеш дирули сай шила ва районна культурала гIямрулизир. Цалра балбуц илини убхIебатурли, хIяжатси мерлаб макьам бирхъули, цархIил мерличиб далай бучIули вирар. Районна ва республикала даражаличир дурадуркIути жура-журала далдуцуначир, конкурсуначир писательти-поэтунала юбилейный вечертачир илини бутIакьяндеш дарили, гьаларти мерани кайсути сари. ХI.СягIидовла шабагъатунала, дипломтала ва грамотабала кьани дебали халаси саби. ЦацадехIти грамотаби ишар дурехIе: «Даргала далай» бикIуси конкурсличир бутIакьяндеш дарнилис бедибси ХIурматла Грамота, «Музыкала гIягIниахълуми ва гIядатуни калахънилис ва тIинтIдирнилис» бикIуси М.ГIяхIмадла уличилси конкурсличибад диплом, «Дила Дагъистан – дила анкъи» бикIуси культурала шайчибси республикала конкурсличибад ХIурматла Грамота, «Дагъиста хъалибарг» бикIуси хъалибаргла художествола шайчирти пагьмуртала фестивальличибад диплом ва гIурра цархIилти.
ХIямид МяхIяммадовичлис чIумаси арадеш ва гIеркъати гIямру дулгулра. ГIуррара даршдусмазиб зайдикIули калаб хIела макьамти.
ЗайбикIаб хIела тIама,
Дубуртазиб Даргала
Шаддирахъули уркIби
ХIу-алавти шантала
ГIурра ахъли зайбикIаб
Лусентази баэсли,
Дарган Батирайлаван
Хабарлизиб калесли.
П.Шахова
