ИцIарила шантани ишди бурхIназиб уржили дурабухъи, дахъал хIянчи дариб. Дурала мераначиб хIербирути бархли кумекличи музабухъун. ХудуцIла ва ИцIарила шимала ургарти мер-мусаличир цIадикилри ва тIабигIятлисцунра ахIи, адамтала арадешлисра урехи акIублири. ИлхIели сабри шилизибти ва дурала мер-мусаличиб хIербирути ицIариланти цIа дишахъес гьалакбиубти. Илкьяйдали шила бекI Ибрагьим ШяхIбановли бекIдешлиуб 30-цад адам цIа дилшахънила баркьудилизи ахъиб. Лебилра шанти дурабухъунхIели, цIа дишахъес имканбакIиб.

ИцIариланти гIур шиличибадли гьарахъли ахIи тIашси къалаличибадли шиличи баайчи гьуни къулайбирес бехIбихьиб. Янила замана ил гьуни вайси агиличи бикилри, адамти башес имканагарсили бетаурлири. Бахъалгъунти адамти шила дураб хIербирухIели, гьундури хIеруди агартили детарулри ва илди къулайдарес имканти аги.

Шантала жигарчебси бузерила гIяхIдешличибли гьуни къулайси агиличи бикахъиб ва заб-маркали цаладикахъибти гIянжи-къаркъализибадли умубариб. ИцIарилантани илкьяйдали шила мер-муса къулайдирнилизира белгиси пай кабихьиб.

«КъияндикибхIели цабиубли, цалис цали кумекбирнила мягIничебси баркьуди дураберкIиб ИцIарила шила шантани. Уржибдешличил дузухIели, нушани балагь-кьадарла анцIбукьунира агардарира ва гьундурачир урехиагарли дашести имкантира акIахъубра. Шантала илдигъунти баркьудлумани бикьридеш дирули сари вегI акIубти мер-мусаличи диги лернилис ва къияндикибхIели сезаманалра музабухъес хIядурли биънилис», — буриб шила бекIли.

Дахадаевла районна администарцияла пресс-служба