Ахъушала районна лерилрара-сера шимазиб дявила хасси балбуцлизир бутIакьяндеш дирути бахъал гIяхIгъубзни леб. Бургъантани ВатIан багьандан чула гIямру ахIерадирули ахIен. Цугнила шилизибадти шел бургъан СВО-ла майдайчиб алхун. Илдазивад ца сай Кьурбанов Запир Рабазанкьурбановичра.
Рабазан Кьурбановла бегIти Дагестанские Огни бикIуси шагьарлизиб хIербирути саби. Запирра 1984 ибил дуслизив ил шагьарлизив акIубсири. Запирла дурхIядешра ил шагьарлизир ардякьун, илаб школара таманбариб.
ГIяхIти хIял-тIабигIятличилси, валгунси, тянишдеш дирес балуси, бахъал юлдашунала вегI урши сайри ил. БегIтани илизир ВатIайчи диги адикьур ва гIямрула бархьси гьунчи дураиб. Запирла лебти саби гIурра ца узира кIел рузира. Илдира бегIтани Запир кьяйдали бяркъчебтили халабаахъиб.
Запир Кьурбановли Россияла ГIяскуртазиб сунечи хъарси чебла ихъули, ВатIайс къуллукъбирулира калунсири.
ГIур хъайчикайили, жура-журала хIянчурбачив узули, яшавбирулира калунсири. Запирла хIябал урши-рурсира лебти саби.
2022 ибил дуслизиб мобилизация барили, дявила хасси балбуцлизи аркути жагьил адамти–ургав леври Запир Кьурбановра. Илини СВО-лизир ВатIа ва халкьла челябкьла багьандан гъабзадешличил ургъули, гьунарти чедиахъули калун. Амма 2025 ибил дусла мартла 21-личив Запир Рабазанкьурбанович къел-хIерзи агарли веткахъиб.
Ишдусла июль базличив ил варгиб, гъабзадешчевси ургъан дявила авлахъличив алхири (бунагь-хатIа урдуцаб сунела). ВатIан ва чеабиуси наслу багьандан, илини сунела жан кьурбандарилри.
Запир Кьурбанов гIямрулизивад арякьи гIергъи, илала гъамтази Россияла Федерацияла Оборонала Министерствола шайзибад Гъабзадешла орден бедиб.
ЧевяхIсини Гьалжанала агьлула вараб сай, ва илкьяйдали ВатIан багьандан алхунти лебилра бургъантира. Илдани фашизм тIинтIхIебиахъес багьандан чузибад лябкьусигъуна гъазабариб.
Жяв-жявли илди анцIбукьунира ахирличи дикили, лебилра бургъанти чула бегIтачи, дурхIначи ва хъалибаргуначи чарбухъес кьадарбиаб!