«Дергълис гъабзадеш дигахъу» ибси бурала лебси саби. Гьарли-марли дергъли мурул адамтала гъабзадеш ва игитдеш белгидирути сари. Дунъяла башрилизир дургъбала игитунала умира гьар бархIи имцIадикIули сари. Гьанна бусягIят, ВатIайс дебали къиянси манзиллизиб, гъабзадеш дакIудирути Игитуни нушани телевизортазиб, газетаби-журналтазиб ва социальный сетаназиб чебиулра. Дунъяла челябкьла талихIчебсили, шаласили биахъес ва чеалкIуси наслу даршуси заклиуб хIербиахъес илдани чула жан ахIерадирули ахIен. Украинала мер-мусаличиб бетурхуси дявила хасси балбуцлизир бахъал дубурлан уршбани бутIакьяндеш дирули сари. Тамаша ахIенгу, дубуртала тяхIуси гьава гьигьбирули, авлахъунала жагадешуни ва тIягIям кайсули халакабаибти, халкьла гIядатлати адамдешла бегIлара дурхъати къиликъуни чузи кадихьибти, шанда бару кьяйдали чIумати уркIбала бегIти, гIякьлу-дагьрилизиб ахъти, ламус-яхIлизиб чебяхIти гъубзни ВатIа хъархIерагардеш батахъес дуракабухъи саби.
Душма хIярхIялис михъири гьалабуцес хIядурли дурабухъунтазивад ца сай дила макьалала игитра. Ил сай Сергокъалала районна ХIурхъила шилизивадси ГIялибеков Нариман Зубайруевич.
Нариман ГIялибеков акIубси сай 1996 ибил дуслизив ноябрьла 12-личив. ХIурхъила урга даражала школа таманбарили гIергъи, Нариман дудешличил варх хъулри лушнила бузерилизи ахъибсири. Гьанна кIел дус ил СВО-ла бутIакьянчи сай.
Н.ГIялибеков 2022 ибил дусла ноябрьла гехIличив сай гIяхIъулали Сергокъалала районна военкоматлизи вякьунсири ва Украинала мер-мусаличи укьес дигниличила багьахъурсири. Ил дусла ноябрьла 25-личив частьлизивад ДНР-лизи вархьибсири. ХIябал баз илав кали гIергъи, Запорожьела областьлизи вархьиб. Гьанна бусягIятра Нариман илав сай.
Дявила баркьудлуми тамандирули дакIударибти гъабзадеш багьандан, Н.ГIялибеков Жуковла медальличил шабагъатлавариб. Республикала правительстволира Нариман ГIялибековла хIяракат пикрила дураб хIебатур, ва «Дявила баркьудлумала ветеран» бикIуси медальличил шабагъатлавариб.
«Нариман ГIялибеков дебали малхIямси, дигичевси, халатала хIурматбируси, биштIатала кьадри балуси, адаб-хIяяли парчикIуси, сунечи хъарси къуллукъ итмаданал таманбируси урши вири», —или бурули сари илала классла руководительница Раисат Айвазовнани.
Ургъанничил бетерхурси ихтилат хIясибли, нуни Н.ГIялибековла мурад багьурра. СВО-лизи ил арукьнила сабаб — патриотизмала бегIлара цIакьти хIялани илизир дургъни.
«Пачалихъла сегъунтилра гIяхIдешуначи дила хьул аги. Дергъла цIала сегъуна гIямзилав къаршииркусал нуни багьес вирхIейрус. Амма ВатIан батахъес нугъунти уршби дурабухъунхIели, илдала къяйлизив нура виэс хIяжатли саби ибси пикри бакIиб. Чичилра лехIхIейзурли нуни ил пикри бетерхахъурра», — викIи Н.ГIялибеков.
Илдигъунти Игитуни лебил улкала пахрули бетарули саби. Нариман ГIялибековлис ва илала дявила гьалмагъунас чIумаси арадеш, сабур ва чедибдеш дулгехIе. Чула уркIбазибси дявила гьав ахъли бихахъес Аллагь икьалавиаб!
ПатIимат Шахова
