…Ишдусла зумадиуб­ти заб-маркали юр­тани-алавти мер-муса гьар журала кьаранази, низ­ба­зи гIеладушиб. Улкьайлабад дура хIер бархьбизур, унраличивси уршили, ГIяб­­дулкарим Наримановичла уршила ур­ши, кьарла халуби лайдакIес дихули че­диулра. Чинад сарира дихути или хIеръира ва кьар удули ГIяб­дул­ка­рим Нариманович чеира.
Итмадан уркIиличи дакIиб мякьлабси юртлизир гIяхIцад дусмазир хIер­рирули калунси тухтур ПатIимат Чамкуровнала гъай: «Унраличив дебали гIяхIси адам сай ГIябдулкарим На­риманович!» Илди дугьби эгер че­буркъаллири къулбасдарес, марли­ра, ишавси цалра адам гIела витI­хIей­кIи, сенахIенну сай хIерируси къатI­ли­зиб хIурмат сархибси адам сай ГIяб­дул­карим ИсмягIилов, илгъуна саби сунела хъалибаргра.
ГIергъити дусмазир аги-кьяйда гIяхIдиубли хьалли, гьалар гьаман дирутири шин, хутI агарли кавлути замунти. ИлхIелира бегI гьалав масъала гьунчибикахъес дураулхъуси, се бетаурлил ахтардибируси ГIябдулкарим вири. Шин яра хутI агарли бахъхIи кав­лули биалри «ГIябдулкарим хъу­лив хIергар, виалри ихцадхIи анцI­букь бекIхIебарили хIебалти» ди­кIу­тири. Цагьачам унрубала хъулрази цIа­дикибхIелира ГIябдулкаримла ха­ласи кумек бетаурсири — илала гаражлизибси халаси моторличил шин дяхIчиаили, цIа тIинтIхIедиахъес имканбакIибсири.
…Наб гьаман гьандиркути дирар ТIантIала школализир ручIухIелла дусми. ИтхIели илав директор сайри ГIябдулкаримла дудеш Нариман Ис­мягIилов. ГIяхIил бучIути уршби-рурсби ХIямшимала школализи се­гъу­на-биалра конкурслизир яра цархIил балбуцлизир бутIакьяндеш дарахъес бикутири. Чуйнара кьацIли дахес нуша Нариман ИсмягIиловли сунела юртлизи дукира. ГIябдулкаримла неш ХIябибатли нушаб гьаладирхьути чуднала, хинкIала тIем наб гьаннара гьанбиркули лебал. ХIябилра гIяхIти, ахъти адамдешличил чула шилизибра ТIантIала шанталара хIурмат сархибти сабри илди, бунагь-хатIа урдуцаб чула!
Чула дурхIназирра адикьур илдани гIяхIти къиликъунира, жавабкардешра, адамтачи дигира. ГIябдулкаримла рузби Марьям ва Людмила къаршибикалли — алавчарси дунъя имцIали шалабиубсиван билзули бирар.
ГIябдулкарим Нариманович дахъал дусмазив жавабла къуллукъуначив узули сай, ХIямшимала шила администрацияла бекIли, районна багьудила управлениела начальниклира узули калун. БусягIят районна администрациялизив узули сай. «Дагъистан Республикала муниципалитетла кабизла хIурматла хIянчизар» ибси уличи лайикьикили, «Бузерила ветеран» ветаурли сай.
Чинав узули виалра хала­хIерхуси, хIянчи дигуси, акьудеш хIейгуси адам сай ил. Юрт-алав се лебал балагарси хIисаббиру ва балбиру, биру-балтусилизиб цархIиллис гIяхIси пикри гIеббуру.
…Гъай-мез агарси, дебали черетаибси, адамтала хIурмат сархили, педагогла санигIятра бузахъуси ГIябдулкарим Наримановичла гIямрула рархкья Сабият Сунгъуровнара Ахъушала шилизир ва арагIебли районнизир машгьурриубси адам сари. Сабият Сунгъуровнанира касили сари районна администрацияла, багьудила управлениела шайзирад ХIурматла Грамотабира, «РФ-ла багьудила хIурматла хIянчизар» ибси ура. Выпускникуначил гьунибаъни дураберкIибхIели Ахъушала районна бекI МяхIяч Кьадиевичли сунела цаибси учительница Сабият Сунгъуровначила сецад гIяхIти гъай дурибал зал бицIибти адамтани дакьиб. Сунени бучIахъули калунтазибад гьарилли баркалла ируси учительница риъни сабабли иличи бикули бирар сагали школализи аркьути дурхIни хIядурбарахъес. Чула дурхIназира гIяхIси багьудира касахъили, бяркъчебтили халабаахъили, гIямрула гьунчи дураиб ГIябдулкарим Наримановичли ва Сабият Сунгъуровани. Дила узи Шамиллис гьарил-декIар адам кьабулвиркуси ахIен. ИсмягIиловхъала уршбазивад ца — Шамил дебали гапвирули вирар.-- ДР-ла экономикала Министерстволизив узуси илини сунела районничи къячбилкуси суал заманаличиб арзес сецад къайгъибирули вирарал бурули.
Дебали гIяхIти бегIти бири Сабиятлара, бунагь-хатIа урдуцаб чула. Илала неш Муъминат, алавчарти унрубас дяхI шалали рирусири, цархIилла тяхIяр-кьяйда хьархъардии, адам уркIичевварес балусири. «Муъминат гьалар къарширикалли — вегIла балбуцибси гIяхIил бетарули бирар», -- бикIутири алавчарти.
Далгунти хъалибаргуназиб хала­баибти ГIябдулкарим Наримановичли ва Сабият Сунгъуровани гIямрулизиб чули касибси гIяхIси бяркъра бегIтала гIибратра хьулчили детаахъурли гIямруличи хIядурбариб чула дурхIнира, гьанна адамдешла гьуникад башахъес бурсибирули саби илдачибад акIубтира!
Гьардизаб чула гIяхIти кьасани ва разибираб дурхIнани, узи-рузини, лебилра гъамтани! Разидешличи гьарли-марли лайикьти адамти сабину ГIябдулкарим Нариманович ва Сабият Сунгъуровна!