Дагъиста БекI Сергей Меликовли гIеббуцибси «Школалис савгъат» бикIуси эстафета Дагъиста районтала бургачи, министртачи, Халкьла Собраниела депутатуначи ва цархIилти учреждениебала хIянчизартачи тIинтIбирули саби.

ХIера, ишди бурхIназиб ил Ахъушала районнизира баиб. Ахъушала районна центрлизибси С.М.Кировла уличилси Ахъушала урга даражала школализи кIел дурхъати гIяхIял бакIиб. Илди сабри гьалаб ил школализиб бучIули калунти Дагъиста Правительствола Председательла Цаибил заместитель Руслан ГIялиев ва районна бекI МяхIяч ГIябдулкаримов. Школала бучIанти ва учительти илдас разили гьунибаиб.

Цаибил вице-премьерли ва районна бекIли чус гьунибаэс бакIибти ахъушантази нушала республикализир ва Ахъушала районнизир дурхIнази багьуди кайсахънила черкадти сагати проектуначила буриб. ГIур илдани саби бучIули калунси школалис савгъатунира дедиб.

ГIяхIлази школала директор Сабият МяхIяммадовани чула школализир дурхIнас багьудлуми дедлугнила низам-кьяйда ишбархIила тIалабуначи далдиркахъниличила буриб.

Гьунибаънила ахирличиб илини учительтала, бучIутала ва илдала бегIтала шайзибад гIяхIлас баркаллара багьахъур.

Ахъушала районна багьахънибала политикала шайчибси  управление