Лавашала районна Карекъаданила шилизиб «Битва в горах 3» бикIуси халаси кьадрила дявила самбола шайчибси абз бетерхур. Буралли, ил абзла бутIакьянчибала лугIи гьар дус халабикIули саби.

Абз ибхьнила балбуцлизир ДР-ла Халкьла Собраниела депутат Шамил ГIямаровлира бутIакьяндеш дариб.

Абзла баянти хIясибли, МяхIячкъалала «Мустафаев ММА» азадли мушулвашнила клублизиб руркъутани цаибил мер касиб, Лавашала «Олимп» бикIуси дурхIнала-жагьилтала спортла школализиб руркъутани кIиибил мер касиб, хIябъибил мер Грозныйла самбистунани сархиб.

«Спортла цалабяхъунала духIнар ва регионти-ургар гьалмагъдешла бархбасуни дебадикIахъес багьандан, илдигъунти далдуцуни дурадуркIес хIяжатли сари. Хаслира илди абзани дубуртала гьарахъти шимас дебали мягIничертили детарули сари. Дахъалгъунти абзани шагьуртазир сари детурхути, шимазибти  дурхIнала ила башес имканти агара, ил багьандан абзани дубуртазир  дурадуркIес даимдирехIе. ДурхIни халати гъира-иштяхIличи бястIлизи кабилзули саби», — викIи Ш.ГIямаров.

Илини илкьяйдали абзла сиптакартас, илдала лугIилизив – ММА-ла тренер ГIяхIмад Мустапаевлис, жагьилти спортсменти гIеббурцнилис баркалла багьахъур.

Абзла сиптакартани депутатлис «Битва в горах 3» бикIуси абз дураберкIахъес кумекбарни, илкьяйдали республикализиб дявила самбо гьалабяхI башахънилизи белгиси пай кабирхьни ва жагьилти арати гIямру дуркIниличи жибирни багьандан Баркаллала кагъар бедиб.

Эльза Чубанова