Ишди хIеб-дуцIрумлизир Дагъистайзир хъярхъти заб-марка дарили, халкьлис дахъал зарулти диахъуб, дигалли шила хозяйствола шайчир, дигалли гьундури-хъулрала шайчир. Илдала асурти гьаннара агардирули лер.
Дубуртала мер-мусаличир имцIаливан зараллизи дикиб гьундури. ШинкIадеш дахъдиубли, гIянжи-къаркъа хIусдухъунти анцIбукьуни дахъал кадикиб. Илдигъунти анцIбукьуни детаур Сергокъалала районна ГIяймаумахьила шилизирра. Амма къияндешуни дяхIяэс, илдас мутIигIхIебикIес бурсибиубти шанти цабалги, чула цIакьаначил ва харжаначил гьундури къулайдарес дурабухъун. Ил хIяракатлизир жигарла бутIакьяндеш дариб Халимбековхъала хъалибаргли, дудешли ва уршбани. Чула зугIлуми бекIдарес мурталра лаг-катхIел башути илдани гьундурала ва илдала даражлумала кьадри-кьимат иргъули, чус ва илкьяйдали шантас къулайдешуни детаахъес къайгъилизиб дурабухъун шилизи аркьути гьундурачир диубти нукьсандешуни агардарес. ХIусдухъунти гIянжи-къаркъа илдани дигалли някъ-някъли, дигалли кIатали уркасиб. Техника тIалаббарес, кабукес бажардибикалли, илала кумекличилра халасигъуна хIянчи дурабуркIулира гьундури къулайдиахъес имканбакIиб.
Илис гьаларра шила духIнарти гьундурира вайси агиличи дикибхIели, шанти, хаслира – мурул адамти, уржили дурабухъи, илди къулайси агиличи дикахъес бажардибикиб. ХIялалдиаб чус, хIяжатлихIели арц дучили, ити хIянчи барес кумек хIяжатли биалли, барх дурабухъи, шилизирти шуртIри гIердуцес къайгъи дакIубирути шанти саби гIяймакантла.
Шилизирти гьундури къулайси агиличи диркахънила дахъалгъунти анцIбукьуназир «Беларусь» бикIуси сай-вегIси эксковаторличил хIянчи дирули вирар Сулайбан Халимбековли. Ил техникала цIакь адхIебиути масъулти акIалли, илала дудеш ГIумар Халимбековли багьалис буцили, халаси журала эксковаторра жибирули вирар. Илра шантас дебали халаси кумек саби.
Гьундури къулайдирнила хIяракатлизир Халимбековхъала хъалибаргла дурарад бутIакьяндеш дариб шила бекI МяхIяммад ГъазимяхIяммадовли, илала заместитель Шамил ГIялиевли, Тимур ХIямидовли, МяхIяммад МяхIяммадовли, Руслан ГIя­лиевли, Шамил Расуловли ва Мухтар ГIяб­дул­кьасумовли. Баркалла биаб, илгъуна ки­рила баркьуди бетерхахъурли, арагIебли шила шантас гIяхIдешуни дарибти лебтасалра.
Къияндешуни дяхIягалли, нушала дагъистанланти мурталра ца хункIла шелра тIулван уржили илди агардарес дурабулхъули бирар. Цати баркьудлумачил, цати пикрумачил илди гьамадли дяхIяэсра имканбикIур. ХIера, тяп илкьяйда биъни чебаахъиб ишди бурхIназиб ГIяймаумахьила асил уршбанира.