ГIергъити дусмазиб МяхIяч­къа­лалис гьуни чебиахъути зумали барс­бикIутири, илаб бузути эко­но­микала шайчирти такьсиртази бир­ку­тири, халкьла ихтиюрти далтахъути ор­гантани илди хIянчиличибад акьубалтутири ва жавабкардешличи битIикIутири. Шагьарлис гьу­ни чебиахъутала бузериличи шагьарла халкь ра­зили ахIенри, разиагардеш со­циаль­ный сетаназиб бегIлара чеб­бикIибси тема бе­таур­лири.
Гьарли-марли шагьарлис гьуни чебиахъути зумали барс­бикI­­ниличибли ил вегIа­гар­сили, сунезиб умудеш агарсили бетаурсири. Гьайгьайрагу, дила пикрили, шагьарлис гьуни чебиахъути лебилра вайти адамти, такьсирчиби ахIенри.
Бурала лебси саби: «Лебилра халкьанас гьуни чебиахъути, илди халкьаначи лайикьти саби», — бикIуси.
МяхIячкъалалантира, шагьарлис гьуни чебиахъутачибра гIяхIти хIебурги. Дила пикрили, илдазибад бахълис, саби хIербируси шагьар, саби хIербируси юрт дигахъули ахIен, илди умули дихIули ахIен. Сегъуна гIяхIдеш бирара диги агарси мерличиб? Диги агарси мерличир, цаличи итилла гIяйибти дирар. Хьулчи агарти гIяйибти лерти мер-мусаличиб, Аллагьла баракат хIебирар.
Гьанна се барес гIягIнили нушала шагьарлизи баракат чарбарес багьандан?
Гьарил шагьарланни, сунени бируси гьар секIайс сунела хIяяла гьалар жавабкардеш дихес чебиркур, шагьар сунени лайбакIибси нясдешличил, няс­хIе­барес багьес гIягIниси саби. НушакIун дахъал лерра. Гьарилли ца кампетла ка­гъар, бацIбиубси кофела стакан лайбакIалли, шагьар нясдешунази гIелабиркур. ВегIличи хъарси барили гIергъи, чичилра гIяйибта виркьесра асухIебирар. Ну гIяхIсира ит вайси сай викIни, шайтIа баркьуди саби. ШайтIан гъу­дурбиубси мерличиб сегъуналра гIяхIдеш, баракат хIе­бирар.
Лерил чедир дурибти, даг хIянчиларад аркьухIели гьунчиб бузули къаршибикибти шагьарла умудеш гIеб­­бурцуси бекIахъудила къул­лукъунала хIян­чи­зарти чебаибхIели акIубти пикрумас гьалагъай сари.
Илдани халаси хIянчи барили, Редукторный посё­лок­лизибси машинаби ласдируси мява-алавти мер-муса къулайси агиличи дуршулри. Илдани галгубала, кьа­дубала, роза вавнала имцIати кьялуби кьицI­ди­рул­ри, дерубти кьар, илдачил гъудурти нясдешуни дурчулри. Илди уржили бузулри. Ил бахъал адамти башуси, ми­житла мякьлабси мер саби. Дебали разириубра илаб умудеш барибхIели.
Журналистла хIер гIядатла адамталагъуна ахIен, цархIилти мер-мусаличир дурадуркIути, шагьар жагабирути хIянчира нуни чедиулра. Дарибти хIянчилис хIера ихра барили, баркалла биаб чус рикIулра. ХIебарили калунси барахъес хьулрикIулра. Рирхулра къулайдешуни детарниличи, тяп илкьяйда саби бахъалгъунти цархIилти шагьарлантира. Илданира лерилра секIал чедиули, далули, къулайдешуни детарниличи бирхули саби.
Наб дигулра шагьарлис гьуни чебиахъутира, ил умубирутира, шагьарла халкьра гIяхIти, умути, шагьар дигахъути бетаэс багьандан саби-ургаб абзлизи кабизурли. ГIяхIдеш бирути баркьудлуми, пикруми ЧевяхIси Аллагьли гIердурцути сари. Ил багьандан илди гьамадли детурхар.
Шагьарлис гьуни чебиахъутира, илар хIер­дирути халкьра шагьар дигахъули хIер­дирахIелли, нушала шагьарлизир баракатра, умудешра дирар.