Ахъушала районнизибра хъалибаргла, дигила ва мардешла БархIи ахъси даражаличиб дураберкIиб.
Балбуц хIядурбарилри «Ахъушала район» МО-ла администрацияли, районна хьунул адамтала Советли ва культурала управлениели. Илизир бутIакьяндеш дариб «Ахъушала район» МО-ла администрацияла бекI МяхIяч ГIябдулкаримовли, илала заместитель, районна хьунул адамтала Советла председатель Эльвира ХIясанхIусейновани, СВО-ла бутIакьянчибала хъалибаргунани, шимала бургани, учреждениебала, организациябала руководительтани, жавабла хIянчизартани ва бахъал цархIилтира гIяхIлани.
Шадлихъ ибхьули, гъайухъун районна бекI МяхIяч ГIябдулкаримов: «Гьарил адамла гIямрулизиб бегIлара мягIничебси баркьуди саби хъалибарглизиб диги ва мардеш дихIни. Адамла гIямрулизиб дигичебти, марти адамти биалли, ил саби бегIлара гIяхIси. Гьарил адамлис сунела хIянчилавад хъули чарухъунхIели, иличи хIерли дигичерти, марти хъалибаргуни диаб! Лебтасалра арадеш, сархибдешуни, гьарбизуни диаб!»
Балбуцличир гъайрухъун Му­хIе­ла шилизивадси СВО-лизир гIям­­ру кьурбандарибси Ханпаша ГIяб­дуллаевла гIямрула рархкья Зум­руд ШяхIбанова. Зумруд ШяхI­ба­новнани буриб СВО-ла бутIа­кьян­чибала ва яшавлизир нукьсандешуни лерти, бахъал дурхIнала бегIти хъалибаргунас гIеббиахъуси кумек­ли­чила. «Гьарил адамла гIям­рулизиб хъалибарг халаси мягI­нала секIал саби, цали цала хIур­матбирули, дигиличил, чеабиуси наслулис гIяхIси, патриотдешла шай­чибси бяркъ бедили абикьес гIягI­­нити саби», — рикIи районна хьунул адамтала Со­ветла председательла заместитель, «Память гор» бикIуси СВО-ла бутIакьянчибала ва ветерантала Ахъу­шала районнизибси ассоциацияла председательла за­меститель Зумруд ШяхIбанова.
Балбуцличи лебри жибарили Кавкамахьилизивадси СВО-лизив алхунси МяхIяммад ГIялиевла бегIти — Мя­хIяммад ГIялихIяжиевич ва Марьям Калбизовна, МухIела шилизи­бад­си Рашидовхъала хъалибарг — ГIялиатда Заирбекович ва ГIяйшат Исламовна. МяхIяммад ГIялиевла ва лебилра ВатIа, халкьла челябкьла багьандан СВО-лизиб алхунтала хIурматлис «ЛехIдешла минутра» ба­гьахъур.
Байрамличил цалабикибти му­ба­ракбариб, лебтасалра дахъал гIяхIти дугьби дуриб цархIилти гIяхI­ланира.
Шадлихъличи лерри жидарили Ахъушала районнизиб хIурматличил пайдаладикIути хъалибаргуни. Илди сабри: ХIямшимала шилизибадти РажабгIяли Куруглиевич ва Аминат Ибрагьимовна, Уллучарала шилизибадти — ХIясан МяхIяммадхIяжиевич ва ПатIима ГIяхIмадовна, РФ-ла МВД-ла Ахъушала районна УУП-ла ва ПДН-на начальник Рабазан МяхIяммадович ва Марьям ГIусмановна. Илдани хIурматла хъалибаргуни районна администрацияла шайзибад конвертуначил, савгъатуначил ва вавначил шабагъатлабариб.
Илди дигиличил хIербирути Мя­хIям­­мадовхъала ва ХIясанов­хъала хъа­либаргуни «Ахъушала район» МО-ла администрацияла ЦСЗН-на на­чальник Камил БяхIянд­мя­хIям­ма­довли «Мардеш ва диги дихIни багьандан» бикIути медальтачил, сав­гъатуначил ва вавначил шабагъатлабариб.
Ахъушала культурала управлениела хIянчизарти Пирдаус ХIя­­жи­мяхIяммадовани, Абакар Кьур­­банадамовли, Кумсият ГIяхI­ма­довани, ЖумягI ГIялиевани, Зуль­фия Рабадановани, Шарип МяхIям­ма­довли, ХIузаймат Ибрагьимовани, Раисат МяхIяммадовани чула пагьмурти чедаахъили, мардешлис, дигилис, гъабзадешлис, игитдешлис багъишладарибти къу­гъа­ти далуйтира делчIи, «Ахъуша» ансамбльли Балхъарла миллатла жагати делхъ дарили, шадлихъла бутIакьянчиби разибариб. Усишавадси пагьмучевси поэт БяхIмуд Булатовли хъалибарг­лис, ВатIайс, мардешлис хасбарибси назму белчIун.
Гьар мурталра кьяйдали, шадлихъ бузахъулри пагьмучерси, малхIямси тIамаличилси, Ахъушала культурала управлениела хIянчизар Салимат Мусаадаевани. Жигарчебли ва чебетаахъили хIянчи бирулри культурала управлениела хIянчизар «Ахъуша» ансамбльла бутIакьянчи ЖумягI ГIисаевани.
Балбуц разити аги-хIяйзиб бетерхур. Ил хIядурбарибтасра баркалла багьахъес дигулра. 

Сабият ГIябдуллаева