Шабагъатличи лайикьрикиб
Гьар дус дурабуркIуси педагогунала совещаниеличиб багьудила учреждениебазиб дахъал дусмазиб хIялалси бузери бирути, дурхIнала багьудлуми имцIадикIахъес къайгъибирули, илизи халаси пай кабирхьути мугIяллимти Россияла багьуди тIинтIбирнила шайчибси Министерствола ва ДР-ла багьудила, гIилмула Министерствола шайзибад, ахъти шабагъатлабирули бирар.
Илди-ургар лерри Ахъушала урга даражала цаибил школализир, нешла мезла ва литературала дурсри кадирхьули, рузуси, пагьмучерси мугIяллим Халикьова Жамилат Кьурбановнара.
Ж.Халикьова, ДР-ла БекIла къуллукъуни заманалис дузахъуси Ф.Щукинна ХIукму хIясибли, «Дагъистан Республикала рурибси мугIяллим» ибси уличи лайикьрикиб. Жамилат Халикьова акIубси сари Ахъушала районна Зилмукь махьилизир, хIурматла хъалибарглизир. Дахъал дусмазиб илини Ахъушала урга даражала цаибил школализиб хIянчи даимбирули, дурхIнази багьуди касахъес, илдас гIяхIси бяркъ бедес къайгъибирули сари. Илини дурхIназир нешла мезличи диги адилкьнилизи ва мяхIкамдирнилизи халаси пай кабирхьули сари. Жамилат Халикьова, гIяхIси мугIяллимцунра ахIи, дебали пагьмучерси поэтессара сари. Илини делкIунти жура-журала темабас хасдарибти назмурти чуйнара районна «Бархьдешла гьуни» газетализирра ва цархIилти изданиебазирра дурадухъунтири.
Черетаибси, гIяхIти хIял-тIабигIятличилси Жамилат Кьурбановнани чумал дус, «Ахъушала район» МО-ла багьудила управлениела методкабинетлизибра, жавабкардешличил рузули, хIялалси хIянчи бариб.
Ралгунси, гьалмагъдеш дузахъес балуси Жамилат Кьурбановнани, сари чинар рузули кали риалра, шанти-ургаб, сунени бучIахъути дурхIнала бегIти-ургаб халаси хIурмат сархес бажардирикиб. Районна духIнарти цархIилти организациябачилра илини бархбас бузахъу. Ахъушала шилизибси музейлизир, школабазир, библиотекабазир, шимала культурала Юртаназир нешла мезлис хасдарили дурадуркIути шадлихъуначирра, машгьурти поэтунала ва лукIантала пагьмуртас багъишладарибти гьунибаънибачирра илини бутIакьяндеш диру.
Гьаннала гIергъира бузерилизир сархибдешунира имцIадикIули, сунела дигутани разирирули, хIерриэс кьадарбиаб Жамилат Кьурбановнас! Илгъуна ахъси шабагъатличи лайикьрикниличил бархбасахъи, нушанира хIурматла мугIяллим мубаракрирулра ва илала гIямрулизир гIяхIдешуни дулгулра!