Сергокъалализибадти мушлукьяби
Июльла 26-личибад 28-личи бикайчити бурхIназиб Москвализиб ветерантала-ургаб азадли мушулбашнила шайчибси Россияла Чемпионат бетерхур.
Сергокъалала районна вакилтанира илизир жигарла бутIакьяндеш дариб. Илдала хIясилти гьарли-марли пахрубирнилис сабаблира детаур.
ГIумарасхIяб МяхIяммадов – районна азадли мушулбашнила шайчибси спортла школала бекIливиубси тренер сай. Илини 70 килограммличи абикайчиси битIакI хIясибли мургьила медаль сархиб.
Илини руркъули калунси Мурад Ибрагьимовлира чихъти устадеш чедаахъиб, дебали декIси 130 килограммличи абикайчиси битIакI хIясибли жармала медаль сархиб.
Илди сархибдешуни – гIяхIцад дусмазиб барибси хIянчила, спортлис мардешла ва гьарли-марси мушлукьяла хIял-тIабигIятла хIясилти сари.
Чемпионти илдигъунти сархибдешуначил мубаракбирехIе, Сергокъалала район машгьурбирутас гьатIиралра халати чедибдешуни дулгехIе!