Се сари арц? Жура-журала суратуначилти кагъуртив? Арц, иш дунъяличир бегIлара гIяхIтира ва бегIлара вайтира секIал сари. Иш белкIлизиб нуни иличила бурес дигулра.
Арц агарли адам хIериэс вирули ахIен. СенахIенну арцли сай адам кьацIли валхуси, палтарли вегIируси ва хъали-цIа лугуси. Баягъи илдани саби адамла уркIила гьав ахъбирахъуси ва илкьяйдали кабиркахъусира. Иш сияхI гIурра даимбарес вирар.
ИмцIатигъунти анцIбукьуназив арцли адам хамвирахъули сай. ГIе, илкьяйдали саби. Арц дикибмад адамли сунела тухум, юлдашуни, бегIти хъумуртули сай. Асили бегIла дурхъати палтар-кьяш, машинаби, яхтаби, телефонти, мургьи… ТIашдалтули сари халати юртани ва илаб сабицун саби илди хIеркабирути. Асили гьарахъти мер-мусаличи билетуни бамсриахъес башули саби.
Тамаша. Амма илдани ца секIал иргъули ахIен. ХIева вецIал азирла биаб, шударш къурушла биаб, илини ца хIянчи саби бируси — адамла чарх кIапIбирни. Тяп илкьяйдали сари пайдаладирути цархIилти секIалра.
Сай зягIипикибу, дедили арц бегIлара дурхъаси дарман исули сай. Амма ил илис балбиркули ахIен. БебкIала бурушличи калхьули сай.
ЧевяхIсиличирад нуша мицIир-чIянкIли ва ахъри агарли дакIира тяп илкьяйдали иличи чаррадулхъутира. Итил дунъяличи нушани нушала бунагьуни ва гIяхIти баркьудлумицун сари духес дирути.
Хужаим вебкIили гIергъи илала мас-хазна чина диркути вара? Илди иш дунъяличир кавлути сари, ва илала тухумти-ургар дявличил дуртIути сари.
Ил багьандан, хIурматла узби-рузби, диругIерли гIяхIдешуна дирули, хIялалли хIердиэс къайгъибиреная. Дикибу арц, мяхIкамли пайдаладарес багьирая. Чарх заябирути секIулти хIейсули, арагIебли ил чIумабирахъути секIулти исес къайгъибиреная. Ну вирхулра, хIушани дила пикри иргъниличи. ГIяхIли каленая!
МяхIяммадшапи Матаев
