Ахъушала районна Урганила ши дебали жагаси мерличибб саби. Алавчарли вава-кьарли варакьдарибти дубурти, вихла тIамаличил дубуртазирад кадухъунти хIуркIби ва миъван дяргIибти урунжуни.
Гьайгьайрагу, илгъуна жагаси мерличив акIубси адам гIядатласили виэс хIейрар. Гьарли-марли илгъуна сай дила белкIла игитра. Илизир дигалли малхIямдеш, дигалли кабизалачердеш, дигалли мурхьти багьудлуми лер.
Иличил хIуша тянишдирули, илала гIямруличила камти баянти дурес дигулра. Саламов Салам ГIяшурлаевич акIубси сай Ахъушала районна Цугнила администрациялизи кабурхуси Урганила шилизив, гIядатла дубурланна хъалибарглизив. 1986 ибил дуслизив ил Урганила урчIемал дусла школала цаибил класслизи аркьули сай. СакIубси, серхурси, секIал багьес халаси гъира лебси уршили бусягIят багьудила дигIяндешуни дяркъур. Дусличи-дус Салам белчIудилизив гьалавяхI вашулри, илала диги имцIали математикаличи дири. Сегъуна-дигара масъала илини гьамаддешличил ирзи. ГIяхIти кьиматуначил Урганила школала 9 класс тамандарили, сунела белчIуди даимбарес ил цархIилти сунечил барх бучIутачил Цугнила урга даражала школализи аркьули сай. Иларра илини сунела мурхьти багьудлуми чедаахъиб, мурталра илала сурат хIурматла уркьуйзиб бири. Лерилрара-сера предметуни илини ункъли дали, мурталра олимпиадабачир жигарла бутIакьяндеш дири. 11 ибил класслизив учIухIели, Дагъиста пачалихъла университетли дурабуркIуси математикала олимпиадаличир бутIакьяндеш дарили, цаибил мер буцили, ил имтихIян агарли чедиб бурибси вузлизи уцибсири. 1997 ибил дуслизиб чихъти кьиматуначил Цугнила урга даражала школа таманбариб. Ил дуслизив ил университетлизи кьабулварибсири. Илавра ил гьабкьятала лугIилизив вири, гIяхIти кьиматуначил университетра белчIи, математикала ва физикала мугIяллимла дипломра касили, 2002-ибил дуслизив ил сунела шилизи чарулхъули сай, сай учIули калунси Урганила школализи, математикала мугIяллимли. ИлхIели школа урга даражалаличи шурбатурлири.
Школазив узути цаибти бурхIначивад илини коллективла ва бучIантала ургаб халаси хIурмат сархиб. Илини гьарил дарс дебали жагали, методикалашал балбикахъили, компьютерла гьаркьяти технологияби пайдаладарили дурабуркIу. Салам, сунела шилизивцунра ахIенну, алавти шимала школабанира мурталра гIяхIладли живиру, программаби, сагали дакIудухъунти электронный тяхIярла журналти ва дневникуни дицIахъес, МЭШ бикIуси программала дазурбазиб белчIудила план балбикахъес Саламли сунечил барх бузутас халаси кумек биру.
Районна багьудила управлениели чуйнара ил ХIурматла Грамоталичил шабагъатлавариб. БусягIятра Салам математикала ва информатикала мугIяллимли узули сай. Илини бучIахъути бучIантани ЕГЭ-личир ва ОГЭ-личир чихъти баллани кайсу.
Салам чумал дус директорла белчIудила шайчивси заместительлира калун, илкьяйдали школала профсоюзла руководительра сай. Салам ГIяшурлаевич гIяхIси педагогцун ахIенну, пергер хъалибаргла бекIра, дудешра сай. Сунела гIямрула рархкья Наидачил кIел рурсира ца уршира абилкьули саби. БегIтигъунти кабизалачебти, хIурматличил бурибти бетарниличи дирхулра илдала акIубтира.
ГIямрулизир ва бузерилизир гIурра сархибдешуни диубли дигулра, хIурматла Салам ГIяшурлаевич!
Кьади ГIялисултIанов
