Иш макьалализиб нушала шилизивадси урибси тямада, ва хIурматла мугIяллим Аскадин ГIялиевичличила белкIес дигулра. Аскадин ГIялиевич акIубси сай 1940 ибил дуслизив Ахъушала районна ХIямшимала шилизив, ГIялила ва Асиятла хъалибарглизив. Илала дудеш ГIяли 1942 ибил дуслизив ЧебяхIси ВатIа дергълизи арякьунсири. Хъули чархIевхъунси ва сегъунтилра сунечила баянти агарси ил къел-хIерзи агарли веткахъибтази халируси сай.
Аскадин ГIялиевичла бегIти шагьарлизиб хIербирутири. Дудеш дергълизи арякьунхIели, неш виштIаси уршиличил шилизи гечриубсири.
1946 ибил дуслизив Аскадин ГIялиевич школализи вехIихьибсири. Ит замана школа вецIал дусла бирусири. Школализиб бузути бахъалгъунти дурабад бакIибти мугIяллимти сабри. Къиянти аги-кьяйдаличи хIерхIеили, чеалкIуси наслу багьудичебтили абикьес илдани халаси къайгъи барибсири.
Школа таманбарили гIергъи, Аскадин ГIялиевич 1957 ибил дуслизив Сергокъалала педучилищелизи керхурсири. Илабси белчIуди таманбиубли гIергъи, ил шила школализив узес вехIихьибсири. Цазаманализиб илини ДГПУ-лизибра бедлчIуди хъараахъурсири. Аскадин ГIялиевичли гьаланачи арифметикала дурсри кадирхьи, гIур биалли — 1974 ибил дусличивад вехIихьили географияла.
Аскадин ГIялиевич шилизирти мукърачи тямадалира вашусири. Илкьяйдали шилизир детурхути далдуцунала сиптакарли ва жигарчевси бутIакьнячили вирусири ил.
Аскадин ГIялиевич сунени бучIахъули калунтани дебали гIяхIси учитель ва адам кьяйдали гьануршули сай. Сунела санигIят ункъли бяркъурси учитель сайливан илини нушазира дахъал секIал дагьахъур или бурули саби илдани.
Аскадин ГIялиевичла руркъянтазибад бахъал леб: гIилмуртала кандидатуни ва докторти, машгьурти тухтурти ва цархIилти сянигIятчиби. Чулира шила тарихлизи, ил гьалабяхI арбукнилизи ва гIеббурцнилизи халаси пай кабихьибти.
2019 ибил дуслизив Аскадин ГIялиевич пенсияличи арякьун. БусягIятла заманара илини халаси пай кабирхьули саби районна ва шила культурализи. Илала ралликьяна Зайнаб — гьаннара дурхIни руркъути организациябазир рузули сари.
Аскадин ГIялиевичла бузери пачалихъли ва шила шантани чуйнара кьиматлабариб.
Марьям ГIяхIмадова
