Дигили бицIибси уркIи адамтачил сахаватли буртIуси, ГIяйшат Кьурбановна Бибалаева халкьани-ургабси хьунул адамтала байрамла БархIи имцIали гьанриркули сари. Ил бахъал хьунул адамтас гIямрула гIибрат сарливан гьанрушес лайикьли сари. ГIяхIси неш, муруйс марси, сунела анкъила цIа даим ванали бихIуси хьунул, тухумтачи уркIи изахъуси, сари акIубси Тирисанчи ва Дахадаевла район дигахъуси, МяхIячкъала шагьарла дурхIнала арадешлис къарауйчирси, тухтур, бучIантас уркIи гьаргбируси поэт, журналист, писатель — лерилра илдачира, гIурра гIяхIцад цархIилтира гIяхIти дугьбачи ГIяйшат Кьурбановна Бибалаева лайикьли сари.
Лерилра сунела гIямрулизир халкьлис кумекбирули къуллукъличи каризурси хьунул адамла баркьудлуми, сецад гапдаралра, илдас баэсцад кьимат кабатес хIейрар.
ГIяйшат Кьурбановна СССР-ла арадеш бихIнила рурибси хIянчизар, бузерила ветеран, жагьилтала насихIятчи, Россияла писательтала ва журналистунала Союзла член, илхIелира гIядатла дубурлан хьунул адам сари.
Шилизир жагьси тухтурли рузухIейчирад, чула бегIлара челукьусиличил — зягIипбикибти дурхIначил, дубурлан хьунул адамти иличи дугьабилзутири. Илдазибад гьариллис ванаси девра, бархьси насихIятра, кункдеш бихуси, къалабаси кумекра илала лертири.
Гьанна бусягIят, гьести гIямруличирхIелира бахълис гIягIнисили, чараагарсили, кумекбарес хIядурсили кавлули сари. Дахъал дусмазир, шагьарла дурхIнала кIиибил поликлиникала някъбира, уркIира, рухIра ретаурли сари, хIянчила мерличир, бахъал адамтас, гьарил минут, гIягIнириркули сари.
Азир журала тиладиличил иличи адамти, гьар бархIи дугьабилзули саби, илдас се хIяжатлил аргъили, гIягIнисигъуна кумек ва насихIят илини гIердиахъули сари.
ГIяйшат Кьурбановна иш дунъяла лерилра челукьутала аварализир сари, илини пикри бяхIчихIеили, авараагарли селра батес рирули ахIен.
ГIяйшат Кьурбановна черрикIибси гъайла уста сари. Гъайличил, алавчартала рухIла гьав ахъбурцули, сари-алавти гIяхIти бетарахъули хIеррирули ва рузули сари.
Гьарил секIайс бархьси кьимат кабатес багьудира, гIякьлура, духудешра лебси, пагьмучерси поэт, писатель, журналист, нушала газетала марси гьалмагъ, даргала культураличи, гIядатуначи, мезличи уркIи изахъуси ГIяйшат Кьурбановна Бибалаева халкьани-ургабси хьунул адамтала байрамличил мубаракрирулра. Илис чIумаси арадеш булгулра. УркIи жагьли, рухI шалали, пикруми гьардилзули, хъалибарглизир талихIчерли, дахъал дусмазир, хIерриубли дигулра.
Муъминат Хаттаева
