Ризван Муслимович Хъубзаров акIубси сай ХIямшимала шилизив хIурматла учительтала хъалибарглизив.

Илала бегIти Хъубзаров Муслим МяхIяммадович ва Хъубзарова РайхIянат Рабадановна Ахъушала урга даражала хIябъибил школализиб бузули калун. Илдала кIел уршира лебри.

РайхIянат Рабадановна 4-ибил классличирад рехIрихьили, 10-ибил класс таманбиайчи нушала классла руководительра сарри, физикала, геометрияла дурсрира кадирхьусири. МалхIямси, пагьмучерси, дигичерси, сунени дирути дурсрачи диги акIахъес халаси къайгъибируси учительница сарри. Школала лебилра-сера бучIантас ил дигахъусири, илала халаси хIурматбири.

Муслим МяхIяммадович школализив завучлира узусири, математикала дурсрира кадирхьусири.

Нуша 10-ибил класслизир дучIухIели, Муслим МяхIяммадович Калмыкиялизи узес арякьунсири, РайхIянат Рабадановна нушази рикIусири: «Наб хIуша дархьдатес хIейгули, Калмыкиялизи аррукьес дигули ахIенра, Муслим раши викIулихьалли». Биаллира, гIергъиси дус аррякьун сунела гIямрула вархкьячи.

Илди Калмыкиялизиб чумал дус хIербирули калун. Илди хъули чурбулхъухIели, кIелра бехIемцIлизи бикили, алхунтири (Аллагьли бунагь хатIа урдуцаб чула).

Илдала кIелра урши цIуръабиуб. Илди чула хала бегIтани ва гъамтани абикьур. КIелра урши духути, жавабкарти, гIяхIгъубзни бетаурли халабаиб.

Ризван Хъубзаров вягIда хIясибли СВО-ла мер-мусаличив ургъули сай.

Сирияла халкьлис урехи лебхIели, Россияла пачалихъли илдас кумекбарахъес нушала бургъанти бархьибтири. Ризванни иларра бутIакьяндеш дарибтири. Гьанна биалли, дявила хасси балбуцлизирра бутIакьяндеш дирухIели, гъабзадеш чедаахъни багьандан Россияла Президентла ХIукму хIясибли, Жуковла медальличил шабагъатлаварили сай.

Аллагьли ахIерабарили, ара-сагъли хъули чарбухъахъес кьадарбиахъаб сунесра лебилра сунечил барх улкалис къуллукъбирутасра!

С.ГIябдуллаева