КIишала школала мугIяллимтани ил школализиб  гIяхIцад дусмазиб бузули калунти, гьанна пенсияличиб хъули кабиибти чула бархкьябачи гьаббакIес пикрибариб. Илгъуна баркьудили пенсияличибти педагогуни разибарницунра ахIи, мугIяллимтала наслубала ургаб бархбас кабизахънилисра икьалабиру.

Чумал мугIяллимлизибад цалабикибси кьукья чула бархкьябачи гIяхIладли гьаббакIиб. Педагогунала гьунибаъни гьарли-марси байрамличи шурбухъун: мугIяллимтани вавнала халуби пешкешдариб, иличибли пенсияличибти педагогуни разити хIяланани бицIахъиб. Педагогикала бузерила ветерантачилси ихтилатлизиб ванадешла ва гьалмагъдешла аги кабизурлири. Пенсияличибти мугIяллимтани саби школализиб бузухIелила бурхIни гьандикахъиб, замана арбашукад школа ва дурхIни барсбикIниличила хабурти дуриб. Илдани жагьилти мугIяллимтас бузерилизир багаладиэсти насихIятуни гIердуриб.

Школала директорла дурхIнас бяркъ бедлугнила шайчирси заместитель Разият Хизриевала гъай хIясибли, чучила къайгънани педагогикала бузерила гIяхIцад ветерантачи асарбарилри.

«Илдигъунти баркьудлумани мугIяллимла бузерила мягIничебдеш чебиахъули саби ва педагогуни санигIятлис марти биъни балахъули саби. Ил барсур хIурматбирнила ва цали ца гIеббурцнила лишанни бетаур. Нушала мугIяллимтани дураберкIибси балбуц дурхIнази багьудлумала гье делгIнилизи ва илди бяркъличи биркахънилизи лерилра цIакьани дяхIчиаибти мугIяллимтала бузери кьиматлабирниличи бяхIчиаибсири. Наслубачирад даибти гIяхIти гIядатуни нушани даимдирулра ва школализиб бучIути дурхIни бархьси гьунчибад башахъес къайгъни дакIудирулра.

НасихIятунала ва багьудлумала кумекличибли дунъя гьатIира гIяхIбулхъахъути педагогунас гьачам-гьатIи баркалла багьахъеси гIяхIси имкан саби ил», — буриб Р.Хизриевани.