Даргала театрла гIяртистунани Ирландияла драматург Р.Б.Шериданна «Дуэнья» бикIуси пьеса хIясибли «День чудесных обманов» ибси спектакль бегIла гьалаб чебаахъиб.

Сагаси спектакль «БиштIаси ВатIа культура» бикIуси проектла дазурбазиб режиссёр-постановщик, Адыгеяла халкьла гIяртист Хакуй Аслан Мугдиновичли гьалабихьибсири. Сцена балкьаахъурсири Адыгеяла халкьла художник Рабазан Сиюховли. ГIяртистунала палтар хасси цехлизир далкьаахъур, илкьяйдали театрла хореографлира музыкала бутIала заведующаянира  спектакль хIядурбирнилизи белгиси пай кабихьиб.

ДукелцIидулхъахъуси пьесала анцIбукь Испаниялизиб кабиркули саби. Илабти давлачебти дудешунани чула жагьилкабизурти рурсбачи хIерудибирахъес хIекьли вайти хьунул адамти бурцулри. ХIера, илкьяйда бариб чехьери рурси Луисала дудеш Дон Джерониманира. Илини рурси сунес хIейгусилис шери редес кьасбарилри. Рерцеси тяхIяр агара или пикририкIуси рурсилис сунела ригуси воспитательница Маргаритани кумекбирули сари. Маргаритала роль бузахъулри ДР-ла халкьла гIяртистка Аминат Дациевани.

Театрла пагьмучебти гIяртистунани спектакль мурталраван хIекьли жагали гьалабихьиб ва, ил лебтасалра дебали гIяхIбизур.

Маргарита Арсланбекова, ГI.Батирайла уличилси Даргала театрла жамигIятличилти бархбасунала шайчирси специалист