Муса БяхIяммадов,
филологияла гIилмуртала доктор, профессор, ДГУ-ла Дагъиста мезанала кафедрала заведую­щий, ДР-ла писательтала Союзла секретарь:
«Иш гьалабихьибси «Дагъиста команда» ибси хIяракат дебали гIяхIси саби. Илала лерилра далдуцуни ишхIелла тIалабуначи далдикибти сари. Гьайгьайрагу, нушаб бегI гьалабси яргализир сагати пикруми гIердурцес, гьаладяхI дашахъес чебиркур. 
Гьалаб бузути, чулира бекIдеш дирули калунти хIякимтанира нушала республика вавалибяхъяхъес декIар-декIарти тяхIурти далдуцибтири, амма иш гьанна акIахъубси балбуц ахъси даражаличиб ва лайикьси тяхIярли дураберкIес халаси къайгъи дакIубарес гIягIниси саби. Баркьудлуми гъайлизирцун калахъес сеналра асухIебирар. Команда биалли, цали цала хIурматбирули, дарх уржили вяшдикIес хIяжатбиркур.
Нушала республика гьарли-марли тамашала ва урхIмешули ахIенси регион саби, сунезирра дахъал миллатунала вакилти цабалги хIербируси. Нушала гъану гехIрадехI мез лер. Ил багьандан нушала алкIути лерилра масъултира, гьайгьайрагу, дарх хIердирес, гьунчидиркахъес ва ирзес чебиркур. 
Буралли, адамли сунела санигIят ункъли балниличиб гьалабси селра агара. ГIе, гьарил секIайзир санигIятлашалти устадеш чараагарли хIяжатти сари. Амма иш командализир декIар-декIарти миллатунала вакилтала уржибдеш ва балгундеш сари мягIничерти.
БегIлара гьалабси яргализиб пикри бяхIчиаэс гIягIнибиркур миллатла масъалаличира. Ил шайчир мурталра гъай-мез алкIули дирар. Ил масъала гьунчибиркахъехIе бикIули, цацабехIтани чула миллатлацун вакилти хIянчурбачи кабатути анцIбукьуни чумра диубтири. «Сен белгиси миллатлацун багьудичебти вакилти лебли, цархIилтала агарти?» — ибти суалти алкIули сари халкьла. Илдигъунти зиддешуни хIедиахъес багьандан, ил масъала гьунчибиркахънилизирра нуша даим чекадилзес чебиркур, илхIелира нушала дахъал миллатуни лерни халаси сархибдешра биъниличила хъумхIертули.
Бурулра, ну политик ахIенра, амма илди лерилра секIал ункъли далдикахъес, конкурс ахъси даражаличиб бетерхахъес, бехIбуцибси хIяракат Дагъистайс пайдаласили биахъес багьандан, миллатунала лебилра вакилтачи цагъуна хIер биэс гIягIнили саби. ИлхIели бирар хIякимтачи халкьла бирхаудира. ГIур биалли, жамигIятли сагати бяхIчибизунира гIердурцу, нушала республикара гьалабяхI аркьян».