Ахъушала районна культурала управлениелизиб бахъал пагьмучебти хIянчизарти бузули саби. Илдани гьаман районна ва республикала кьадрила далдуцуназир жигарла бутIакьяндеш дирули саби, пергерти делхъла ва далуйтала устнала пагьмурти чедиахъу, миллатла дуббатуни гьаладирхьули бирар.
Илдани илкьяйдали Дагъиста шагьуртазиб, районтазиб, шимазиб бузути пагьмучебти, машгьурти адамтачилра бархбасуни дузахъули сари.
Ахъушала районна культурала хIянчизарти Дагъиста бурибти машгьурти гIяртистуначил, поэтуначил, культурала министрличил ва бахъал гIурра жавабла хIянчизартачил барх суратуназиб чебаэс вирар.
Ахъушала культурала КIялгIялизиб бетерхурси шадлихъличи ракIибси Дагъиста машгьурси поэтесса Аминат ГIябдулманаповачилси суратлизиб нушани чебиулра: Бутрила шила библиотекарь ПатIимат ИсмягIилова, культурала Центрла директор ХIялимат ХIялимова, СДК-ла директор Зубайдат ГIялиева, ТIантIала шила культурала Юртла директор Марьям ХIусейнова, районна культурала КIялгIяла художественный руководитель Пирдаус ХIяжимяхIяммадова.
Илди культурала хIянчизарти дахъал конкурсуначиб, фестивальтачиб гьаларти мераначи лайикьбикибти саби. Ахъушала районна администрацияла бекIла, ДР-ла культурала Министерствола, ДР-ла Халкьла Пагьмуртла Юртла, Ахъушала культурала управлениела шайзибад дахъал ХIурматла Грамотабачил, Баркаллала кагъуртачил шабагъатлабарибти саби. Мисаллис буралли, Пирдаус ХIяжимяхIяммадова «Душа Дагестана» бикIуси Премияла лауреат сари, «ДР-ла культурала рурибси хIянчизар» ибси уличи ва гIурра дахъал шабагъатуначи лайикьрикибси сари.
Дагъистан Республикализир Аминат ГIябдулманапова хIералуси хIергар. Пагьмучерси поэтесса, «Лачин» журналла дахъал дусмазир редакторли рузуси, дурхIнас дахъал сари илини хасдарибти назмурти.
«ДР-ла Халкьла поэтесса», «ДР-ла культурала рурибси хIянчизар» ибти уми илини жявлил касили сари, ил лайикьрикибти Премиябала, ХIурматла Грамотабала, Баркалла кагъуртала, дипломтала лугIира камси ахIен. Аминат ГIябдулманаповани республикала кьадрила дахъал далдуцуназир, шадлихъуназир жигарла бутIакьяндеш дирули рирар.
2023 ибил дусла октябрь базла ахирличиб «Замана» газетала бекI редактор Салимат ГIялиеванира, ил газетала хIянчизар ПатIимат Кьурбанованира, Аминат ГIябдулманапованира барх Ахъушала шилизи архIя дураберкIибсири. Ил архIя дураберкIили Ахъушала районна администрациялизи бакIибхIели, илди хIябалра халаси хIурматла хьунул адамти «Бархьдешла гьуни» газетала редакциялизибра гьунибаибтири. Районна газетала бекI редактор ПатIимат Маллаева ва лебилра редакцияла хIянчизарти дебали разибиубтири гьарахъси гьунчибад илдигъунти хIурматла гIяхIли бакIибхIели.
МалхIямти, цабалгунти, коллективтала ва халкьла хIурмат сархибти, жавабкарти, чебетаибти нушала районна культурала хIянчизартира гьаннала гIергъира цабиубли, чула пагьмурти чеимцIадикIахъули бузес кьадарбиаб!
С.ГIябдуллаева
