Сагаси мерличиб хIянчи жигарчеббиахъуб ДР-ла Халкьла Собраниела депутат, ДГУ-ла профессор, филологияла гIилмуртала доктор ва ДР-ла багьудила ХIурматла хIянчизар ХIясанова Узлипат ГIусмановнани. Бара гьалабван илини Хайдакьла районнизи бузерила архIя дураберкIиб. Районна бекIла заместитель Заур Нагьбаровличил рарх Узлипат ГIусмановнани адамти кьабулбариб. Халкьла челукьути суалти пикрилизи касиб ва хасти органтази даахъес илини чесиб.

Ца-чумал бархIи гьаларли ил гьачам-гьатIи Хайдакьла районнизи рякьун ва «ДурхIя школализи хIядурварес» бикIуси партияла балбуцлизир, сабира «Сагаси школа» бикIуси проектла дазурбазиб бетурхуси, бутIакьяндеш дариб. ВецIал хъалибарглизибадти цIуръа дурхIялис илини канцелярияла гIягIниахълумачилти портфельти савгъатдариб. Районнизибси «Инсан» фондла вакилли илди дурхIнала сияхI У.ХIясановас гьалабихьиб.

Балбуц бетерхур районна бекIлибиубсигъуна библиотекализиб. Балбуцличи дурхIнала нешанира жибарилри.

«Цаси Россия»-ли пикрибарибси гIяхIси гIядатли, цIуръаби ва камси хайрила бегIти хъалибаргуназибти дурхIни гIеббуцнилизиб халаси кумек бирули саби.

Жагали бучIес, чучи хъарти лерилра мисалти ункъли ирзес ва школала гIямрулизир жигарла бутIакьяндеш дирес чесиб дурхIнанира.

«ГIямрула къиянти шуртIрачил къаршибикибти халкьлис пачалихъла кумек мурталра хIяжатли саби. ДурхIнази белгиси багьуди касахъни – гьарил адамла чебла саби. Ил багьандан рируси тяхIярли илди гIеббуцес нуни мурталра къайгъибирис» — или рикIи Узлипат ГIусмановна. Узлипат ГIусмановнас халаси баркалла багьахъур МЦРБ-ла директор, Хайдакьла районна хьунул адамтала Советла  председатель ГIяйшат ГIядбуразизовани.

«Жузличи гьалмагъдикирая. Жагали дучIес кьасбарая. БелчIудили сай адам гIямрулизив гьалавяхI аркуси», —  рикIи ил.

Балбуцла ахирлизиб дурхIнала нешанани Узлипат ГIусмановнас цIакьли халаси баркалла багьахъур.

ПатIимат Шахова